Қашқадарё вилояти ИИБда ички ишлар органларида хизмат қилаётган ходимлар ўртасида “Энг яхши мураббий” кўрик-танлови бўлиб ўтди. Унда вилоят ички ишлар бошқармаси соҳавий хизматлари ва шаҳар-туман ички ишлар бўлимларида хизмат қилаётган ходимлар иштирок этишди. 

Шахсий таркиб ўртасида соғлом рақобат муҳитини шакллантириб, энг истеъдодли ва истиқболли кадрларни аниқлаш, уларни муносиб рағбатлантириш ва қўшимча равишда қўллаб-қувватлаш, шунингдек, маънавий-маърифий, жисмоний, жанговар, касбий тайёргарлик фаолиятини тизимли равишда ташкил этиш орқали ёш ходимларни ватанпарварлик ғояларига садоқат, миллий ва умуминсоний қадриятларга ҳурмат руҳида тарбиялаш, ўз касбининг энг яхшиларини аниқлаш мақсадида ўтказилган кўрик-танловда дастлаб мураббийларнинг жисмоний ва жанговар тайёргарлиги синовдан ўтказилди. 

Дастлаб мураббийларнинг тўсинда тортиниш, 100 ва 1000 метрга югуриш бўйича жисмоний имкониятлари синовдан ўтказилди.  

Шундан сўнг мураббийларнинг бириктирилган ёш ходимларга соҳанинг сир- асрорларини ўргатиш, амалга ошираётган фаолиятида натижадорлик ҳамда юклатилган вазифаларни самарали бажариш, уларда амалий иш кўникмаларини шакллантириш ва хизмат бурчига ташаббускорлик билан муносабатда бўлишини тарбиялаш, фаолиятга доир норматив-ҳуқуқий ҳужжатлар, шунингдек ички идоравий ҳужжатларнинг ижроси ўрганиб чиқилди. 

Танловда мураббийнинг билим даражаси, соҳада амалга оширилаётган ислоҳотлардан хабардорлиги, ёш ходимлар ўртасида соғлом рақобат муҳитини шакллантириш, Ватан олдидаги шарафли бурчини адо этиш, жиноятчиликка қарши курашиш, рўй берганларини фош этиш билан бирга маънавий-маърифий билимини мунтазам ошириб бориш хислатлариига ҳам эътибор қаратилди. 

Қизғин ва муросасиз баҳсларга бой бўлган “Энг яхши мураббий” кўрик-танловда 1-ўринни Яккабоғ тумани ички ишлар бўлими профилактика инспектори майор Баҳодир Ражапов қўлга киритди. 

Навбатдаги совринли ўринларни Қарши тумани ички ишлар бўлими профилактика инспектори капитан Шербек Тўрақулов ва Чироқчи тумани ички ишлар бўлими профилактика катта инспектори майор Асадулла Тошев банд этди. 

Кўрик-танлов ғолиблари бошқарма раҳбариятининг дипломи билан тақдирланди. Энди ғолиб мураббий  танловнинг республика босқичида иштирок этади.