6 Sentyabr 2024 yil
479
Eng yaxshi murabbiy aniqlandi
Qashqadaryo viloyati IIBda ichki ishlar organlarida xizmat qilayotgan xodimlar o‘rtasida “Eng yaxshi murabbiy” ko‘rik-tanlovi bo‘lib o‘tdi. Unda viloyat ichki ishlar boshqarmasi sohaviy xizmatlari va shahar-tuman ichki ishlar bo‘limlarida xizmat qilayotgan xodimlar ishtirok etishdi.
Shaxsiy tarkib o‘rtasida sog‘lom raqobat muhitini shakllantirib, eng iste’dodli va istiqbolli kadrlarni aniqlash, ularni munosib rag‘batlantirish va qo‘shimcha ravishda qo‘llab-quvvatlash, shuningdek, ma’naviy-ma’rifiy, jismoniy, jangovar, kasbiy tayyorgarlik faoliyatini tizimli ravishda tashkil etish orqali yosh xodimlarni vatanparvarlik g‘oyalariga sadoqat, milliy va umuminsoniy qadriyatlarga hurmat ruhida tarbiyalash, o‘z kasbining eng yaxshilarini aniqlash maqsadida o‘tkazilgan ko‘rik-tanlovda dastlab murabbiylarning jismoniy va jangovar tayyorgarligi sinovdan o‘tkazildi.
Dastlab murabbiylarning to‘sinda tortinish, 100 va 1000 metrga yugurish bo‘yicha jismoniy imkoniyatlari sinovdan o‘tkazildi.
Shundan so‘ng murabbiylarning biriktirilgan yosh xodimlarga sohaning sir asrorlarini o‘rgatish, amalga oshirayotgan faoliyatida natijadorlik hamda yuklatilgan vazifalarni samarali bajarish, ularda amaliy ish ko‘nikmalarini shakllantirish va xizmat burchiga tashabbuskorlik bilan munosabatda bo‘lishini tarbiyalash, faoliyatga doir normativ-huquqiy hujjatlar, shuningdek ichki idoraviy hujjatlarning ijrosi o‘rganib chiqildi.
Tanlovda murabbiyning bilim darajasi, sohada amalga oshirilayotgan islohotlardan xabardorligi, yosh xodimlar o‘rtasida sog‘lom raqobat muhitini shakllantirish, Vatan oldidagi sharafli burchini ado etish, jinoyatchilikka qarshi kurashish, ro‘y berganlarini fosh etish bilan birga ma’naviy-ma’rifiy bilimini muntazam oshirib borish xislatlariiga ham e’tibor qaratildi.
Qizg‘in va murosasiz bahslarga boy bo‘lgan “Eng yaxshi murabbiy” ko‘rik-tanlovda 1-o‘rinni Yakkabog‘ tumani ichki ishlar bo‘limi profilaktika inspektori mayor Bahodir Rajapov qo‘lga kiritdi.
Navbatdagi sovrinli o‘rinlarni Qarshi tumani ichki ishlar bo‘limi profilaktika inspektori kapitan Sherbek To‘raqulov va Chiroqchi tumani ichki ishlar bo‘limi profilaktika katta inspektori mayor Asadulla Toshev band etdi.
Ko‘rik-tanlov g‘oliblari boshqarma rahbariyatining diplomi bilan taqdirlandi. Endi g‘olib murabbiy tanlovning respublika bosqichida ishtirok etadi.
