Муносиб номзодлар сараланди
Аввал хабар берганимиздек, ИИВ Қашқадарё академик лицейида саводхонлиги ва жисмоний синовлари якунланиб, соғлигининг ҳолатига кўра талабларга жавоб берадиган номзодлар билан навбатдаги танлов бўлиб ўтди. Учта саволдан иборат билет тортиш йўналишида бўлиб ўтган синовлар вилоят ИИБ соҳавий хизматлари раҳбарлари, лицей ўқитувчилари ва ота-оналардан иборат ўн кишилик ҳайъат томонидан қабул қилинди.
Мамлакатимизнинг мустақилликка эришиши, Конституция тарихи, ўтмишда ўчмас из қолдирган буюк саркардалар, дунё тамаддунига ўз ҳиссасини қўшган ўзбек алломалари ҳаёти, ҳуқуқшунослик фани ва амалдаги қонунчилик борасидаги саволлардан иборат танловда номзодларнинг жисмоний ва маънавий дунёқараши, мактабда олган билими ҳайъат томонидан баҳолаб борилди. Танловнинг очиқ ва шаффоф бўлиши учун савол-жавобларга номзодларнинг ота-онаси ҳам таклиф этилди.
Синовларда номзодлар орасидан билими ва дунёқараши соҳага мос келадиган, маънавий баркамол ўқувчилар сараланиб, улар навбатдаги босқичга қатнашиш ҳуқуқини қўлга киритди.
