Munosib nomzodlar saralandi
Аvval xabar berganimizdek, IIV Qashqadaryo akademik litseyida savodxonligi va jismoniy sinovlari yakunlanib, sogʼligining holatiga koʼra talablarga javob beradigan nomzodlar bilan navbatdagi tanlov boʼlib oʼtdi. Uchta savoldan iborat bilet tortish yoʼnalishida boʼlib oʼtgan sinovlar viloyat IIB sohaviy xizmatlari rahbarlari, litsey oʼqituvchilari va ota-onalardan iborat oʼn kishilik hayʼat tomonidan qabul qilindi.
Mamlakatimizning mustaqillikka erishishi, Konstitutsiya tarixi, oʼtmishda oʼchmas iz qoldirgan buyuk sarkardalar, dunyo tamadduniga oʼz hissasini qoʼshgan oʼzbek allomalari hayoti, huquqshunoslik fani va amaldagi qonunchilik borasidagi savollardan iborat tanlovda nomzodlarning jismoniy va maʼnaviy dunyoqarashi, maktabda olgan bilimi hayʼat tomonidan baholab borildi. Tanlovning ochiq va shaffof boʼlishi uchun savol-javoblarga nomzodlarning ota-onasi ham taklif etildi.
Sinovlarda nomzodlar orasidan bilimi va dunyoqarashi sohaga mos keladigan, maʼnaviy barkamol oʼquvchilar saralanib, ular navbatdagi bosqichga qatnashish huquqini qoʼlga kiritdi.
