Олий Мажлис Сенатида Коррупцияга қарши курашиш миллий кенгашининг навбатдаги мажлиси бўлиб ўтди. Уни Олий мажлис Сенати Раиси, Коррупцияга қарши курашиш миллий кенгаши раиси Танзила Нарбаева олиб борди. Унда Коррупцияга қарши курашиш миллий кенгаши ва ҳудудий кенгашлари аʼзолари, вазирлик ва идоралар, нодавлат нотижорат ташкилотлари, оммавий ахборот воситалари раҳбар ҳамда ходимлари иштирок этди.

Мажлисда мамлакатимизда коррупцияга оид жиноятлар 12 фоизга камайгани, соҳадаги халқаро рейтингларда мамлакатимиз ўрни яхшилангани алоҳида таʼкидланди.

Шунингдек, мажлисда ўтган давр мобайнида соҳага оид 10 га яқин қонун қабул қилингани, шу жумладан, “Манфаатлар тўқнашуви тўғрисида”ги Қонун қабул қилиниб, 2024-йил 6-декабрдан кучга киргани айтиб ўтилди.

Муҳокамалар жараёнида таʼлим ва соғлиқни сақлаш соҳаларида коррупцияга қарши курашиш ишларига эʼтибор қаратилди. Тегишлилиги бўйича Мактабгача ва мактаб таʼлими, Олий таʼлим, фан ва инновациялар ҳамда Соғлиқни сақлаш вазирликларининг ахбороти эшитилди.

Иштирокчилар томонидан мазкур соҳаларда коррупциявий омилларни бартараф этиш, тизимда шаффофлик, адолат, хизмат сифатини ошириш, кадрлар салоҳиятини юксалтириш борасида қатор амалий чоралар кўрилаётганлигига қарамасдан, коррупциявий хатти-ҳаракатлар сақланиб қолаётганлиги танқид қилинди.

Шунингдек, мажлисда Коррупцияга қарши курашиш бўйича 2023-2024-йилларга мўлжалланган давлат дастурининг ҳамда аҳоли ва давлат хизматчиларининг коррупцияга қарши курашиш соҳасидаги билимларини узлуксиз ошириш тизимини жорий қилиш чора-тадбирларининг ижро ҳолати кўриб чиқилди.

Шундан сўнг иштирокчилар Ўзбекистон Республикаси коррупцияга қарши курашиш миллий кенгашининг 2025-йилнинг биринчи ярим йиллигига мўлжалланган иш режаси лойиҳаси ҳамда Коррупцияга қарши курашиш ҳудудий кенгашлари таркибини тасдиқлаш масаласига эʼтибор қаратди.