Oliy Majlis Senatida Korrupsiyaga qarshi kurashish milliy kengashining navbatdagi majlisi bo‘lib o‘tdi. Uni Oliy majlis Senati Raisi, Korrupsiyaga qarshi kurashish milliy kengashi raisi Tanzila Narbayeva olib bordi. Unda Korrupsiyaga qarshi kurashish milliy kengashi va hududiy kengashlari aʼzolari, vazirlik va idoralar, nodavlat notijorat tashkilotlari, ommaviy axborot vositalari rahbar hamda xodimlari ishtirok etdi. Majlisda mamlakatimizda korrupsiyaga oid jinoyatlar 12 foizga kamaygani, sohadagi xalqaro reytinglarda mamlakatimiz o‘rni yaxshilangani alohida taʼkidlandi. Shuningdek, majlisda o‘tgan davr mobaynida sohaga oid 10 ga yaqin qonun qabul qilingani, shu jumladan, “Manfaatlar to‘qnashuvi to‘g‘risida”gi Qonun qabul qilinib, 2024-yil 6-dekabrdan kuchga kirgani aytib o‘tildi.

Muhokamalar jarayonida taʼlim va sog‘liqni saqlash sohalarida korrupsiyaga qarshi kurashish ishlariga eʼtibor qaratildi. Tegishliligi bo‘yicha Maktabgacha va maktab taʼlimi, Oliy taʼlim, fan va innovatsiyalar hamda Sog‘liqni saqlash vazirliklarining axboroti eshitildi.

Ishtirokchilar tomonidan mazkur sohalarda korrupsiyaviy omillarni bartaraf etish, tizimda shaffoflik, adolat, xizmat sifatini oshirish, kadrlar salohiyatini yuksaltirish borasida qator amaliy choralar ko‘rilayotganligiga qaramasdan, korrupsiyaviy xatti-harakatlar saqlanib qolayotganligi tanqid qilindi.

Shuningdek, majlisda Korrupsiyaga qarshi kurashish bo‘yicha 2023-2024-yillarga mo‘ljallangan davlat dasturining hamda aholi va davlat xizmatchilarining korrupsiyaga qarshi kurashish sohasidagi bilimlarini uzluksiz oshirish tizimini joriy qilish chora-tadbirlarining ijro holati ko‘rib chiqildi.

Shundan so‘ng ishtirokchilar O‘zbekiston Respublikasi korrupsiyaga qarshi kurashish milliy kengashining 2025-yilning birinchi yarim yilligiga mo‘ljallangan ish rejasi loyihasi hamda Korrupsiyaga qarshi kurashish hududiy kengashlari tarkibini tasdiqlash masalasiga eʼtibor qaratdi.