Бугун мамалакатимизда жиноятчиликни “маҳаллабай” жиловлаш, аҳолининг кунлик ижтимоий-маиший муаммоларини “оилабай” ва “фуқаробай” ҳал этиш бўйича янгича ишлаш тизими яратилди. Натижада сектор раҳбарлари томонидан фуқароларнинг кундалик ва маиший муаммолари жойида ҳал этилиб,  ортиқча овворагарчиликларнинг олди олинмоқда.

Бироқ, фуқароларга давлатимиз томонидан яратилаётган шарт-шароит ва имкониятларга қарамай улар томонидан турли ҳуқуқбузарликлар ва  жиноятлар содир этиш ҳолатлари юз бермоқда. Яқинда Қарши шаҳридаги Темир йўлчилар маданият саройида содир этилган жиноят муҳокамаси бўлиб ўтди. Унда вилоят ҳокимлиги, ички ишлар бошқармаси Қарши шаҳар секторлар раҳбарлари, Қарши шаҳридаги маҳаллалар еттилиги ҳамда “Геолог” маҳалласи фаоллари иштирок этишди.

Йиғилишда сўз олганлар “Геолог” маҳалласида содир этилган мудҳиш жиноятни юзага келтирган шарт-шароит ва омилларни атрофлича муҳокама этишди. 

Маълум бўлишича, “Қарши-Самарқанд” йўналишида киракашлик билан шуғулланувчи фуқаро шохбекатдан бир йўловчидан катта миқдорда пул ва хорижий валютани эгасига етказиш мақсадида олади. Лекин йўналишга мижоз чиқмагани учун уйига қайтади. Йўлда қўл кўтарган бир йўловчини автомашинасига миндиради. Йўловчи уни Қарши шаҳрининг кўп қаватли уйлари орасига обориб қўйишни айтади. Автомашина  кўп қаватли уйлар оралаб кетаётганда орқада ўтирган йўловчи ҳайдовчига қўлидаги пичоқ билан жароҳат етказади.

Муҳокама йиғилишида жиноятни содир этган шахснинг турмуш тарзи ўрганилгани ва у бекорчи бўлиб, мавсумий ишлар билан шуғулланиши, кўча куйда саёқ юришни одатга айлантиргани айтиб ўтилди. 

Бу фуқаролар бундан олдин ҳам бир-бири билан низолашиб юрганини маҳалла бешлиги “хонадонбай”, “фуқаробай” ишларни амалга оширишда уларнинг ҳаёти ва турмуш тарзи билан қизиқмай ўз вазифасига совуққонлик билан қарагани мудҳиш жиноятни юзага келишига сабаб бўлгани танқид остига олинди. Фуқароларнинг кундалик ташвиши ва маиший муаммолари билан шуғулланиши лозим бўлган маҳалла бешлиги огоҳ ва ҳушёр иш олиб бориб, назоратсиз шахслар турмуш тарзи билан шуғулланиб, уни бандлигини таъминлаганида бу жиноятнинг олди олинарди.

Ҳолат бўйича мутасаддилардан изоҳ сўралиб, ҳар бир маҳалла фаоллари ўз ишини жонлантириши, зиммасидаги масъулиятни ҳис этган ҳолда фаолият олиб бориши, “Геолог” маҳалла фуқаролар йиғини бешлиги зиммасига келгусида бу каби жиноятларнинг олдини олиш борасида аниқ манзилли вазифалар юкланди.