Tadbirni Qashqadaryo viloyati IIB boshlig‘ining birinchi o‘rinbosari polkovnik Baxtiyor Rajapov ochdi.

Boshqarma boshlig‘ining 1-o‘rinbosari Ichki ishlar organlari xodimlari va faxriylarini kasb bayrami bilan tabriklab, ichki ishlar organlari xodimlari va yoshlarga soha faxriylarining  o‘tkazilayotgan  muloqot uchrashuvlarida berayotgan beminnat maslahat va o‘gitlari, xizmatda samaradorlikka erishish borasidagi tajriba va malakasini o‘rgatib kelayotgani e’tirof etildi.

Viloyat hududida jamoat tartibi, fuqarolar xavfsizligini ta’minlash, jinoyatchilikka qarshi kurashish va uni oldini olish, ro‘y berganlarini izlar bosilmay fosh etish, qidiruvdagi shaxslarni ushlash hamda jazo muqarrarligini ta’minlashga o‘zining munosib hissasini qo‘shib kelayotgan bir guruh soha xodimlari va faxriylari viloyat Ichki ishlar boshqarmasi boshlig‘ining “Faxriy yorlig‘i” hamda pul mukofoti bilan taqdirlandi.

Shuningdek, Ichki ishlar organlari tezkor-qidiruv xizmati sohasida yosh xodimlarni har tomonlama tarbiyalash, ularga kasb sirlarini o‘rgatish, vatanparvar, mard va jasur yurt o‘g‘lonlarini kamolga yetkazishdek mas’uliyatli vazifani bugun tizimda faoliyat yuritayotgan ustoz va murabbiylarimiz sharaf bilan ado etib kelayotganliklari uchun bir guruh viloyat Ichki ishlar boshqarmasi faxriylari boshqarma boshlig‘ining “Tashakkurnoma”si va qimmatbaho sovg‘alari bilan taqdirlandi.

Bundan tashqari ichki ishlar organlaridagi xizmat vaqtida o‘z burchini bajarish davomida halok bo‘lgan marhum mayor Yusupov Laziz Erkinovichning turmush o‘rtog‘i Feruza Parmanova qimmatbaxo sovg‘a bilan taqdirlandi.

So‘ngra boshqarma xodimlari va faxriylar bir piyola choy ustida suhbatlashdilar.