Qarshi shahrida viloyat huquq-tartibot idoralari xodimlari o‘rtasida sportning kurash turi bo‘yicha Ichki ishlar vazirligi “Dinamo” jismoniy tarbiya-sport jamiyati  Qashqadaryo viloyati kengashi birinchiligi uchun musobaqalar bo‘lib o‘tdi. Unda kengash tarkibidagi jamoalar g‘oliblik uchun 7ta vazn toifasida o‘zaro bellashdilar.

Musobaqada vaznlar toifasida gilamga chiqqan polvonlar orasida yangi sportchilar kashf  etildi. Ayniqsa, viloyat ichki ishlar va favqulodda vaziyatlar boshqarmalari xizmat qilayotgan yosh polvonlar shijoati musobaqaning qizg‘in o‘tishiga zamin hozirladi.

Qizg‘in va murosasiz o‘tgan musobaqada polvonlar bor mahorat va tajribalarini ishga solib g‘oliblik uchun kurashishdi.

Musobaqada viloyat ichki ishlar boshqarmasi xodimi kichik serjant Azizbek Arabov 60, Favqulodda vaziyatlar boshqarmasi harbiy xizmatchisi Botir Ziëdullayev 66, viloyat ichki ishlar boshqarmasi xodimi kichik serjant Baxrom Boyqulov 73, Ichki ishlar vazirligi Qorovul qo‘shinlari 7533-harbiy qism harbiy xizmatchisi kichik serjant Sardor Abdurayimov 71, Favqulodda vaziyatlar boshqarmasi harbiy xizmatchisi Shoxrux Axmedov 90, viloyat ichki ishlar boshqarmasi xodimi kichik serjant Botir Xoliyorov 100 va Favqulodda vaziyatlar boshqarmasi harbiy xizmatchisi Akmal Gulmurodov mutlaq vaznda g‘oliblikni qo‘lga kiritdi.

Umumjamoa hisobida esa faxrli 1-o‘rinni viloyat ichki ishlar boshqarmasi jamoasi band etdi. Navbatdagi sovrinli o‘rinlar viloyat Favqulodda vaziyatlar  boshqarmasi va Ichki ishlar vazirligi Qorovul qo‘shinlariga qarashli 7533-harbiy qism polvonlariga nasib etdi.

G‘olib polvonlar va jamoalar Ichki ishlar vazirligi “Dinamo” jismoniy tarbiya-sport jamiyati  Qashqadaryo viloyati kengashining diplomlari va qimmatbaho sovg‘alari bilan taqdirlandi.