Qashqadaryo viloyati ichki ishlar boshqarmasi huzuridagi “Faxriylar kengashi” raisi, iste’fodagi polkovnik Sodiq Islomovning yashash xonadonida “Uy muzeyi” ochilishi munosabati bilan tadbir bo‘lib o‘tdi.

 “Uy muzeyi”ni ochilish tadbirida viloyat ichki ishlar boshqarmasi rahbariyati, sohaviy xizmatlar xodimlari, faxriylar hamda ichki ishlar vazirligi Qashqadaryo akademik litseyi o‘quvchilari ishtirok etishdi.

Tadbirda uzoq yillar ichki ishlar organlarida namunali xizmat qilib nafaqaga chiqqan faxriyning namunali va sharafli xizmat faoliyati, davlatimiz va ichki ishlar vazirligining mukofotlari va faxriy unvonlar bilan taqdirlangani yo‘lga qo‘ygan ijobiy tajribalari, yoshlar ishtirokida “Uch avlod uchrashuvi”, “Faxriylar o‘giti” kabi ma’naviy-ma’rifiy tadbirlar aks etgan suratlari hamda ko‘rgazmali eksponatlari  haqida ishtirokchilarga atroflicha ma’lumotlar berildi.

Yoshlar va aholi orasida vatanparvarlik, kasbga sadoqat, hallolik va fidoyilik xislatlarini targ‘ib etish maqsadida tashkil etilgan tadbirda faxriyning nafaqaga chiqqandan keyingi faoliyati davomida erishgan yutuqlarini, boy amaliy tajribasini ommalashtirish lozimligi ta’kidlandi.

Yosh xodimlarda burchga sodiq qolgan holda halol va vijdonan xizmat qilish, xalq oldida ichki ishlar organlarining imidjini oshirishga yo‘g‘rilgan ma’naviy-ma’rifiy tadbir ishtirokchilarda o‘zgacha taassurot qoldirdi.

Bu boradagi tadbirlar davom etmoqda.