Shahrisabz shahrida joylashgan kasb-hunar maktabida o‘quvchilar va o‘qituvchilar ishtirokida Qashqadaryo viloyati IIB Xavfsiz turizmni ta’minlash boshqarmasi xodimlari targ‘ibot uchrashuvi o‘tkazishdi. Uchrashuvda O‘zbekiston Respublikasining 2016-yil 14-sentabrdagi “Yoshlarga oid davlat siyosati to‘g‘risida”gi qonuni doirasida yoshlar bilan ishlash samaradorligini oshirish, voyaga yetmaganlar hamda yoshlar o‘rtasida jinoyatchilik, huquqbuzarliklarni oldini olish, ularni sodir etilishiga imkon berayotgan sharoitlarni bartaraf etish, yoshlarni bo‘sh vaqtlarini mazmunli tashkil etish borasidagi fikr-mulohazalar aytib o‘tildi.

Bundan tashqari, yoshlarni chalg‘ituvchi, ularni o‘z domiga tortishga urinayotgan turli din niqobi ostidagi norasmiy oqimlarning kirdikorlari, giyohvandlik illatiga qarshi kurashish har birimizning vazifamiz ekanligi yuzasidan tushuntirishlar berildi.

Shu bilan birga tadbirda turizm namoyish obyektlarida madaniyat, ma’naviyat hamda tozalikka rioya qilish, xorijiy turistlar bilan xushmuomalada bo‘lish, bundan tashqari, hududda o‘z xatti-harakati  bilan shubha o‘yg‘otadigan shaxslar, yordamga muhtoj mahalliy, xorijiy sayyohlarga duch kelganda viloyat IIB Xavfsiz turizmni ta’minlash boshqarmasining 75- 521-25-05 telefon raqami orqali murojaat qilishlari yoki hududda xizmat olib borayotgan boshqarma xodimlarini xabardor qilishlari yuzasidan tegishli tavsiyalar berildi.

Yakunda ishtirokchilarni qiziqtirgan savollariga mutaxassislar tomonidan javoblar berildi.