Mamlakatimizda yoshlarni har tomonlama ma’naviy barkamol, jismonan baquvvat, har qanday illatlardan xoli ulg‘ayishi uchun barcha shart-sharoitlar mahayyo etilgan. Ularni Vatanparvarlik ruhida, yurtga sadoqat tuyg‘ulari asosida tarbiyalash, ilm-fan va sport sohasida yuksak marralarni qo‘lga kiritishi uchun davlatimiz tomonidan alohida e’tibor qaratilib, bu masala ustuvor darajaga ko‘tarildi.

Amaldagi “Yoshlar va biznesni qo‘llab-quvvatlash yili”da yoshlarni ruhan va jismonan sog‘lom bo‘lib voyaga yetishlari uchun aholi, ayniqsa, yoshlar orasida axloq-odob va sog‘liq doirasidagi huquqbuzarliklarga qarshi kurashish, orttirilgan immunitet virusi infeksiyasi tarqalishini oldini olish va ushbu kasallikni yuqtirishga sabab bo‘layotgan omillarni bartaraf etish hamda sog‘lom turmush tarzini targ‘ib qilish maqsadida

mamlakatimizda “Sog‘lom hayot” maxsus profilaktik tadbirining birinchi bosqichiga start berildi.

Shu munosabat bilan Qarshi muhandislik iqtisodiyot instituti talabalari ishtirokida “Sog‘lom hayot” maxsus profilaktik tadbiri bo‘lib o‘tdi. Unda Ichki ishlar vazirligi Tezkor qidiruv departamenti jinoyat qidiruv xizmati,  Qashqadaryo viloyati ichki ishlar boshqarmasi Tezkor qidiruv xizmati Jinoyat qidiruv boshqarmasi rahbariyati, viloyat organizmda immunitet tanqisligi sindromiga qarshi kurashish markazi shifokorlari ishtirok etishdi.

Tadbirda so‘z olgan  Ichki ishlar vazirligi Tezkor qidiruv departamenti jinoyat qidiruv xizmati katta tezkor vakillari, podpolkovniklar Jamshid Sherov joriy yilning 1 mart kuniga qadar “Sog‘lom hayot” maxsus profilaktik tadbiri ijrosini samarali tashkil etish maqsadida ichki ishlar organlarining jinoyat qidiruv va boshqa sohaviy xizmatlari xodimlaridan iborat ishchi guruh joylarda targ‘ibot va tashviqot ishlarini amalga oshirib kelayotganini ta’kidladi.

“Sog‘lom hayot” tezkor profilaktik tadbiri davomida aholi va  yoshlar o‘rtasida sog‘lom turmush tarzini targ‘ib qilish maqsadida korxona va tashkilotlarda, mahallalarda, barcha ta’lim muassasalarida va boshqa aholi gavjum joylarda “Axloq va sog‘liqqa qarshi huquqbuzarliklar hamda OIV kasalligining ayanchli oqibatlari” mavzusida uchrashuvlarva davra suhbatlarini o‘tkazilishi, targ‘ibot ishlarini kuchaytirish maqsadida bukletlar, eslatma, plakat tarqatilishi, ko‘chalarga bannerlar o‘rnatilgani qayd etildi.

Tadbir doirasida axloq va sog‘liqqa qarshi huquqbuzarliklar sodir etilishi mumkin bo‘lgan tungi klublar, saunalar, SPA salonlar, massajxonalar, sog‘lomlashtirish joylari ham nazoratdan o‘tkazilib, odob-axloq doirasidagi huquqbuzarliklarga moyil  shaxslarning turmush tarzi o‘rganilib, umumiy, maxsus, yakka va viktimologik profilaktik tadbirlar amalga oshiriladi.

Tadbirda viloyat OITSga qashi kurash markazi mutaxassislari ham so‘zga chiqib, kasalligining kelib chiqishi, tarqalishi, fojiali oqibatlari xususida so‘z yuritib, mamlakatimizda va jahon miqyosida OIV infeksiyasi profilaktikasi va uning oldini olish maqsadida bir qator chora-tadbirlar amalga oshirilishiga qaramasdan har yili dunyo miqyosida millionlab insonlar shu kasallik virusini yuqtirib, ko‘plab odamlar mazkur xastalik oqibatida hayotdan ko‘z yumayotganini ta’kidladi. Shu bois bu kasallikni yuqtirib olmaslik chora-tadbirlari xususida o‘quvchilarga atroflicha tushunchalar berildi.

Ochiq muloqot ruhida tashkil etilgan yig‘ilishda institut talabalarining savollariga mutaxassislar atroflicha javoblar berishdi.

Yakunda OIV infeksiyasi kasalligining og‘ir oqibatlari tasvirlangan “Biz OITSga qarshimiz” nomli hujjatli film namoyish etildi.

Targ‘ibot tadbirlari davom ettirilmoqda.