Hurmatli Ichki ishlar organlari xodimlari, harbiy xizmatchilar, ta’lim muassasalari o‘qituvchilari, o‘quvchilari, faxriylar hamda xizmat burchini bajarish chog‘ida halok bo‘lgan xodimlarning oila a’zolari!

Sizlarni 21 mart – Navro‘z umumxalq bayrami munosabati bilan samimiy muborakbod etaman!

Necha ming yillardan buyon ota-bobolarimizdan meros bo‘lib kelayotgan, xalqimizning milliy qadriyatlari o‘laroq ulug‘lanib, qadrlanib kelayotgan qadimiy va hamisha navqiron Navro‘z ayyomi - yangilanish, yasharish va poklik ramzi bo‘lib, millatimizga xos mehr-oqibat, mehmondo‘stlik va muruvvat kabi oliymaqom xislatlarni mujassam etgani bilan ham ahamiyatlidir.

Muhtaram Yurtboshimiz Shavkat Miromonovich Mirziyoev “Navro‘z – inson va tabiatni asrab-avaylashga, tinchlik, do‘stu birodarlik va hamkorlik kabi umumbashariy qadriyatlarni e’zozlashga chorlaydigan ulug‘ bayramdir”, deya e’tirof etganlar.

Bu ulug‘ ayyom umuminsoniy g‘oyalari bilan insoniyat hayotidan munosib o‘rin egallagan. Navro‘z - bu tinchlik, totuvlik, farovonlik bayrami. Millati, dinidan qat’iy nazar, shu yurtda yashayotgan barcha millatlar, elatlar uchun birdek sevimli ayyom. Keksa-yu yosh uchun birdek aziz shodiyona!

Sizlarning elu yurt osoyishtaligi va xalqimiz farovonligini ta’minlash yo‘lidagi ham mashaqqatli, ham sharafli xizmatingizda ulkan zafarlar yor bo‘lishini tilayman!

Yurtimizga kirib kelgan Navro‘z - xonadonlarimizga quvonch, ko‘ngillarga  saodat olib kelsin! Barchangizga mustahkam sog‘lik, uzoq va mazmunli umr, dasturxoningizga fayzu baraka tilayman.