“Huquqbuzarliklar profilaktikasi kuni” tadbiri  doirasida Qashqadaryo viloyatida jinoyatchilik va huquqbuzarliklarni barvaqt oldini olishda ijobiy natijalarga erishish va tegishli profilaktik-ogohlantiruv ishlarni jonlashtirish maqsadida bir qator ishlar amalga oshirilmoqda.  Jumladan, viloyat IIB boshlig‘i o‘rinbosari, podpolkovnik Zavqiddin Xujanov G‘uzor tumani hududidagi bir qator mahalla fuqarolar yig‘inlarida kriminogen vaziyatni jilovlash, huquqbuzarliklar va jinoyatlarni oldini olish, jamoat tartibini saqlash, fuqarolar xavfsizligini ta’minlashga jalb etilgan ichki ishlar organlari, milliy gvardiya, FVB xodimlari, MFY yoshlar yetakchilari va jamoatchilik vakillaridan iborat guruhlarga xizmat oldi yo‘riqnoma o‘tdi.

“Obod va xavfsiz mahalla” tamoyili asosida fuqarolarning muammolari xonadonbay va fuqarobay o‘rganilisht jarayonida uzoq muddatdan kelgan shaxslar bilan proflaktik suhbatlar o‘tkazilib, ularni tibbiy ko‘rikdan o‘tkazildi.

Tuman hududida tazyiq va zo‘ravonlikdan jabr ko‘rgan xotin- qizlarning yashash xonadoniga mahalla beshligi bilan birgalikda borilib, oila azolari bilan suhbatlar o‘tkazildi. Nizoli oilalarda aniqlangan muammolar bartaraf etilib, ayrim xotin-qizlarga himoya orderlari berildi.

Murojaatlarni qabul qilish va hal etish ishlarini jadallashtirish, ortiqcha ovvoragarchiliklarni oldini olish maqsadida ikki yuz ellikka yaqin xonadon va xizmat ko‘rsatish obyektlariga profilaktika inspektorlarining tashrif qog‘ozlari tarqatildi.

Shuningdek, jismoniy hamda yuridik shaxslarning murojaatlarni mas’ul rahbarlar tomonidan nazoratga olinib, murojaat mualliflari yashash xonadonlariga borilib, ijobiy hal etish choralari ko‘rildi.

Amalga oshirilgan ishlar natijasida tumanda muqaddam sudlangan, profilaktik hisobda turgan, ma’muriy huqubuzarlik sodir qilgan, ruhiy kasal, spirtli ichimlikka ruju qo‘ygan qirqqa yaqin fuqarolar bilan  profilaktik suhbatlar o‘tkazilib, ayrimlar shifoxonalarga joylashtirildi. “Mahallabay” o‘rganishlar natijasida ishsiz fuqarolarni bandligini ta’minlash bo‘yicha tegishli idoralarga taqdimnomalar kiritildi.

Probatsiya hisobida va ma’muriy nazoratda turgan bir guruh shaxslarning ish va yashash joylari o‘rganilib, tegishli ta’sir choralari qo‘llandi.

O‘rganishlar davomida G‘uzor tumani “Yonqishloq” mahallasida yashovchi voyaga yetmagan E.F. nazoratsiz va qarovsiz yurganligi sababli viloyat IIB JXX HPB VEIHYOK markaziga joylashtirildi.

Mahalla va jamoatchilik vakillari bilan hamkorlikda 51 ta mahallalardagi doimiy yashash manzillaridan uzoq muddatga chiqib ketgan 63 nafar fuqarolarning oila a’zolari orqali va onlayn suhbatlashilib, vatanga qaytishlari tushintirildi.

Shuningdek, xonadonlarni o‘rganish davomida yangidan  yashash manzillaridan uzoq muddatga ketgan va uyiga xorijdan qaytgan yigirma nafar fuqarolar aniqlanib, avtomatlashtirilgan elektron bazaga kiritildi hamda tibbiyot xodimlari bilan hamkorlikda tibbiy ko‘rikdan o‘tkazildi.

Tuman hudidagi maktablarda voyaga yetmaganlar o‘rtasida huquqbuzarlik va jinoyatchilikni oldini olish bo‘yicha yig‘ilishlar “Davomat” va “Tig‘” tadbirlari o‘tkazildi. Aniqlangan qonunbuzarlik holatlari bo‘yicha voyaga yetmagan yoshlarning ota-onalariga nisbatan qonuniy choralar ko‘rildi.

Amalga oshirilgan profilaktik tadbirlarda “Pasport-viza” qoidalariga rioya etilishi ham e’tibordan chetda qolgani yo‘q. Jumladan, takroriy pasport-viza qoidalarini buzgani, doimiy yoki vaqtinchalik pasport ro‘yxatidan o‘tmasdan yashayotgan va pasportini yaroqsiz holatga keltirgan yoki yo‘qotgan qirqqa yaqin fuqarolarga nisbatan qonun doirasida choralar ko‘rilib, jarimalar undirildi. 

Jamoat tartibini saqlash, fuqarolar osoyishtaligini ta’minlash bo‘yicha tuman IIB JXX YHXB xodimlari tomonidan va yo‘lovchi tashish bilan shug‘ullanuvchi uyushma va korxona rahbarlari bilan hamkorlikda haydovchilar to‘plab, yo‘l- transport hodisalarini sodir etilishini oldini olish bo‘yicha targ‘ibot-tashviqot ishlari hamda reyd tadbirlari amalga oshirildi.

Tadbir davomida yo‘l qoidasini buzgan hamda mast haydovchilar aniqlanib,  qirq nafarga yaqin huqubuzar haydovchilarga jarima jazosi tayinlanib,  15 ta avtomashinalar jarima maydoniga qo‘yildi. Bundan tashqari, avariya o‘choqlarida yo‘l-transport hodisalarining oldini olish maqsadida yo‘l belgilari hamda tuman markazidagi chorrahalariga zamonaviy 8 ta kuzatuv kameralari o‘rnatildi.

Aholiga yong‘in xavfsizligi qoidalariga rioya etish, favqulodda yong‘in kelib chiqqan vaqtlarida uni bartaraf etish yuzasidan amalga oshiriladigan chora-tadbirlar, yong‘inni bartaraf etish usullari jonli misollar asosida tushuntirildi.

Joriy yilning 1-fevraldan 1-martiga qadar mamlakatimiz miqyosida o‘tkazilgan “Yoshlar orasida giyohvandlik vositalari va psixotrop moddalar tarqalishini oldini olish oyligi” doirasida ham targ‘ibot va profilaktik tushuntirish ishlari amalga oshirildi.

Bir so‘z bilan aytganda, tadbir uyushqoqlik bilan tashkil etilgani bois, ko‘plab huquqbuzarliklar va jinoyatlarni oldini olinishiga, fuqarolarning osuda turmushiga zamin hozirladi, desak mubolag‘a emas.