Palandaraliklar gʼolib
Sogʼlom turmush tarzini keng targʼib etish, fuqarolar va yoshlar oʼrtasida ommaviy sportni rivojlantirish maqsadida Kitob tumanida ham bir qator ijobiy ishlar amalga oshirilmoqda. Jumladan, tumandagi sektorlar rahbarlari tomonidan tashkil etilayotgan sport musobaqalari qizgʼin va murosasiz bahslarga boy kechib, fuqarolarning sportga boʼlgan mehrini oshirmoqda.
3-sektorga qarashli Kitob tumanining uzoq togʼli hududida joylashgan 5 ta – “Obikanda”, “Kuxsor”, “Katlos”, “Tevaboshi” va “Palandara” mahallalari fuqarolari oʼrtasida sportning futbol musobaqasi boʼyicha tuman IIB boshligʼi kubogi musobaqasi ham ana shunday tadbirlarning uzviy davomi boʼldi.
Musobaqada barcha jamoalardan ustunligini namoyish etgan “Palandara” MFY yoshlari 1-oʼrinni qoʼlga kiritib, tuman IIB boshligʼi kubogi sohibi boʼlishdi. Navbatdagi sovrinli oʼrinlarni “Tevaboshi” MFY va “Katlos” MFY yoshlari egalladi.
Gʼolib jamoalarga diplom va qimmatbaho sovgʼalarni Kitob tuman IIB boshligʼi 3-sektor rahbari podpolkovnik Ikrom Togʼaev topshirdi.
Bu kabi tashabbuslar davom etmoqda.
