Qashqadaryo viloyati IIBda  Ona tilim – jonu dilim”  mavzusida “Ma’naviyat va ma’rifat darsi” bo‘lib o‘tdi. Unda viloyat IIB rahbariyati, tarkibiy bo‘limlari va sohaviy xizmatlar xodimlari ishtirok etdi. Uni viloyat IIB MMI va KBTX boshlig‘i o‘rinbosari, podpolkovnik Shermuxammad Muslimov ochdi. 

Mavzu yuzasidan Qashqadaryo viloyati IIB  Axborot xizmati rahbari  podpolkovnik Iroda Rasulova so‘zga chiqib, bugun millatimiz ruhini ifoda etuvchi ona tilimiz bizni yuksak ma’naviyatga, ma’rifatga, istiqlolu istiqbolga yetaklovchi bebaho ne’mat O‘zbek tiliga davlat maqomi berilganiga 34 yil to‘lganligini bildirdi.

So‘nggi yillarda davlat tilining obro‘sini ko‘tarish yuzasidan davlat ahamiyatiga molik sa’y-harakatlar amalga oshirilmoqda. Xususan, “Davlat tili haqida”gi qonunning tarixiy o‘rni va ahamiyatini inobatga olgan holda davlat tilini rivojlantirishga qaratilgan ishlarning uzviy davomi sifatida 2020 yil 10-aprelda O‘zbekiston Respublikasi Prezidenti O‘zbekiston Respublikasining “O‘zbek tili bayrami kunini belgilash to‘g‘risida”gi qonunni imzoladi. Unga muvofiq 21-oktabr sanasi yurtimizda “O‘zbek tili bayrami kuni” deb belgilandi. 2020-yil 20-oktabrda esa O‘zbekiston Respublikasi Prezidentining “Mamlakatimizda o‘zbek tilini yanada rivojlantirish va til siyosatini takomillashtirish chora-tadbirlari to‘g‘risida”gi farmoni qabul qilindi.

Mazkur farmon asosida qabul qilingan “2020–2030-yillarda o‘zbek tilini rivojlantirish va til siyosatini takomillashtirish konsepsiyasi”da o‘zbek tilini uzoq muddatli rivojlantirishning asosiy ustuvor yo‘nalishlari belgilangan.

Shuningdek, unda o‘zbek tilini barcha sohalarda qo‘llash doirasini kengaytirish, undan davlat tili sifatida to‘liq va to‘g‘ri foydalanishni ta’minlash maqsadida rahbar kadrlarning davlat tilida rasmiy ish yurita olish darajasini aniqlash mexanizmini ishlab chiqish, mas’ul lavozimlarga tayinlanadigan shaxslar uchun davlat tilini bilish bo‘yicha daraja sertifikatlarini joriy etish, barcha vazirlik va idoralarda idoralararo hujjatlar aylanishi davlat tilida bo‘lishini to‘liq ta’minlash nazarda tutilgan.

Xulosa qilib aytganda, ona tilimiz bo‘lgan o‘zbek tilining nufuzini oshirish, jamiyatda davlat tiliga hurmat-e’tibor va mehr-muhabbat muhitini shakllantirish uchun barcha imkoniyatlar mavjud, meyoriy hujjatlar ham yetarli. Endigi vazifa Prezidentimiz ta’biri bilan aytganda, har birimiz davlat tiliga bo‘lgan e’tiborni mustaqillikka bo‘lgan e’tibor deb, davlat tiliga ehtirom va sadoqatni ona Vatanga ehtirom va sadoqat deb bilishimiz, shunday qarashni hayotimiz qoidasiga aylantirishimiz lozim. Bu olijanob harakatni barchamiz o‘zimizdan, o‘z oilamiz va jamoamizdan boshlashimiz, ona tili-mizga, urf-odat va qadriyatlarimizga hurmat, Vatanga mehrimizni amaliy faoliyatda namoyon etishimiz kerak.

Ulug‘ ma’rifatparvar bobomiz Abdulla Avloniy ta’kidlaganidek, har bir millatning dunyoda borligini ko‘rsatadigan oyinai hayoti – bu uning milliy tili va adabiyotidir. Shu bois ham har birimiz ona tilimizni asrab-avaylashimiz, e’zozlashimiz lozim.

Yakunda boshqarma TQKB bo‘lim boshlig‘i, mayor Firdavs Muxammadiyev hafta mobaynida dunyodagi ijtimoiy-siyosiy vaziyat to‘g‘risida yig‘ilish ishtirokchilariga ma’lumot berdi. So‘ngra, “Gripp kasalligi va uning asoratlaridan ogoh bo‘ling!” mavzusida  viloyat IIB DPM TB SENM boshlig‘i mayor R.Daminovning tavsiyaviy ma’ruzasi tinglandi.