Qarshi shahridagi 18-sonli “Nurli maskan”da “Nurli maskan orzulari” mavzusida IX - respublika forumi bo‘lib o‘tdi. O‘zaro tajriba almashish, yoshlarni bilim va malakasini oshirish, kasb-hunar o‘rgatish ishlarini takomillashtirishga bag‘ishlangan tadbirda respublika IIV va viloyat IIB rahbariyati yurtimizdagi barcha viloyatlardagi “Nurli maskan” maktab-internatining iqtidorli o‘quvchilari, o‘qituvchilari ishtirok etishdi. Tadbirni viloyat IIB boshlig‘i, polkovnik Abduvoxid Ismoilov ochib, forum ishtirokchilarini qutladi.

   Forumda IIV JXX HPB boshlig‘i polkovnik Baxtiyor Berdialiyev so‘zga chiqib, O‘zbekiston Respublikasi Prezidentining 2022 yil 18 apreldagi “Ko‘zi ojiz va zaif ko‘ruvchi bolalar uchun ixtisoslashtirilgan maktab-internatlarda ta’lim berish sifatini oshirish hamda ular faoliyatini yanada takomillashtirish chora-tadbirlari to‘g‘risida”gi PQ-209sonli Qaroriga asosan, mamlakatimizda «Inson qadri uchun» tamoyili asosida nogironligi bo‘lgan shaxslarni qo‘llab-quvvatlash tizimini yanada takomillashtirish, xususan ko‘zi ojiz va ko‘rishda nuqsoni bo‘lgan bolalarning jamiyatdagi o‘rnini mustahkamlash yuzasidan zarur chora-tadbirlar amalga oshirilayotganini ta’kidladi.

Mazkur yo‘nalishdagi islohotlarning izchilligi va tizimliligini ta’minlash, ko‘zi ojiz va zaif ko‘ruvchi bolalarning ta’lim olishi uchun yaratilgan shart-sharoitlarni yanada yaxshilash, ularning jamiyatga moslashuviga ko‘maklashishni yangi bosqichga olib chiqish maqsadida Ichki ishlar vazirligi tomonidan «Nurli maskan» maktablarida bir qator ma’naviy-ma’rifiy tadbirlar o‘tkazib kelinmoqda.

«Nurli maskan» maktabi o‘quvchilariga sifatli ta’lim va tarbiya berish, ularning maishiy sharoitlarini yaxshilash, shuningdek, o‘quvchilarning bo‘sh vaqtini mazmunli tashkil etish hamda intellektual, jismoniy va ijodiy qobiliyatlarini rivojlantirishga e’tibor qaratish, o‘quvchilarning jismoniy imkoniyatidan kelib chiqqan holda, ularni sog‘lom, ma’nan yetuk inson qilib tarbiyalashga hamda dunyoqarashini shakllantirish, sport turlariga qiziqtirish va jalb etish, o‘quvchilarning vatanparvarlik tuyg‘ularini shakllantiruvchi madaniy-ma’rifiy tadbirlarni tashkil etilayotganini qayd etdi. 

Shundan so‘ng, IIV ishchi guruhi va viloyat IIB rahbariyati hamda mehmonlar respublikaning turli viloyatlaridan kelgan «Nurli maskan» maktabi o‘quvchilari tomonidan qo‘lda to‘qilgan kiyim-kechaklar va tegishli ustaxonalarda yasalgan qo‘l mehnati mahsulotlari ko‘rgazmasini ko‘zdan kechirishdi. 

Qarshi shahridagi 18-sonli “Nurli maskan”ga qarashli poyabzal mahsulotlari ishlab chiqarishga ixtisoslashgan o‘quv ustaxonasini ochilish tadbirida ishtirok etishdi.