Mehr nuri yogʼar doim yuzingizdan ustozlar
Qashqadaryo viloyati IIB tasarrufidagi “Yulduzcha” maktabgacha taʼlim tashkilotida 1 oktyabr – Ustoz va murabbiylar kuni munosabati bilan “Mehr nuri yogʼar doim yuzingizdan ustozlar” mavzuida sahnalashtirilgan tadbir boʼlib oʼtdi. Unda viloyat IIB, MTT tarbiyachilari va ota-onalar ishtirok etishdi.
Dastlab tadbirda sahnaga bolajonlar tayyorlov guruhi chiqib, ustoz va murabbiylarni tabriklashdi. Tarbiyalanuvchilar Vatanga sadoqat va muhabbat, uni sevish, uni koʼz qorachigʼidek asrash, yurtni istiqloli va istiqboli, osoyishtaligi yoʼlida xizmat qilayotgan ichki ishlar organlari xodimlarining ustoz va murabbiylarini sheʼriy tilda qutladi.
Soʼngra, tayyorlov guruhi tarbiyalanuvchilarining Vatanni, ustoz va murabbiylarni madh etuvchi sahna koʼrinishlari ishtirokchilar olqishiga sazovor boʼldi. Guruhlar joʼrligida kuy-qoʼshiqlarni ijro etishdi.
