Ma’naviyat va ma’rifat markazi Qashqadaryo viloyat bo‘limida Ichki ishlar organlarida faxriylari o‘rtasida “Yilning eng faol faxriy xodimi” tanlovi bo‘lib o‘tdi. Unda viloyat ichki ishlar organlarining sohaviy xizmatlari va shahar-tuman ichki ishlar bo‘limlarining faxriylar kengashi raislari ishtirok etishdi.

Dastlab, har bir kengash raisining faoliyati, faxriylarning Vatan osoyishtaligi va yurt tinchligi yo‘lidagi uzoq yillik mehnatini inobatga olgan holda xizmatni o‘tash davrida orttirilgan jarohati tufayli nogiron bo‘lib qolgan  faxriylarni moddiy va ma’naviy qo‘llab-quvvatlash borasidagi faoliyati va bilimi hakamlar hay’ati tomonidan baholab borildi.

So‘ngra, ularning yil davomida amalga oshirgan ishlari bo‘yicha axboroti eshitilib, albomlari ko‘rib chiqildi. Bunda hududiy  kengash raisining yosh xodimlarga kasb sirlarini o‘rgatish, faol faxriylarni ularga biriktirish, yoshlarning xizmat intizomi va qonunchilikka og‘ishmay rioya etishi uchun murabbiylik harakatini kengaytirish, “Ustoz-shogird an’analari”ni yangi bosqichga olib chiqish, yosh xodimlarning milliy qadriyatlarga sodiq, chinakam vatanparvar va fidoyi “xalq xizmatchisi” bo‘lib shakllanishi uchun “Ma’naviyat va ma’rifat darsi”da “Ustozlar o‘giti” shiori asosida amalga oshirgan faoliyati atroflicha o‘rganib chiqildi.

Bundan tashqari, Prezidentimizning tegishli farmon va qarorlari, ichki ishlar organlarida o‘tkazilayotgan islohotlarga daxldorligi, “Bir murabbiy o‘n yoshga mas’ul” shiori asosida qizil toifadagi mahallalarni yashil toifaga o‘tkazish borasidagi sa’y-harakatlariga ham e’tibor qaratildi.   

Tanlov natijalariga ko‘ra Chiroqchi tumani ichki ishlar bo‘limi faxriylar kengashi raisi, iste’fodagi mayor Erkin Murodov 1-o‘ringa loyiq topildi. Navbatdagi sovrinli o‘rinlarni Qarshi shahar shahar ichki ishlar organlari faoliyatini muvofiqlashtirish boshqarmasi faxriylar kengashi raisi, iste’fodagi mayor Ibodulla Xusanov va Dehqonobod tumani ichki ishlar bo‘limi faxriylar kengashi raisi, iste’fodagi podpolkovnik A’zamqo‘l Jovliyev qo‘lga kiritdi. 

G‘oliblar tanlov hay’atining diplomi va qimmatbaho sovg‘alari bilan taqdirlandi.

Tadbir yakunida faxriylar bilan yoshlar bir piyola choy ustida suhbatlashdilar.