Qishloq xo‘jaligida energiya tejamkorligini joriy qilish yuzasidan seminar tashkil etildi
Qamashi tumani G‘ishtli
mahallasi hududidagi "Islomobod" fermer xo‘jaligida energiya tejamkor
nasoslardan foydalanish, Quyosh panellarini keng joriy qilish masalasida
semenar o‘tkazildi.
Unda viloyat IIB boshlig‘i
Abduvohid Ismoilov, tuman sektor rahbarlari, fermerlar va qishloq xo‘jaligi
mutasaddilari ishtirok etdi.
Qamashi tumanida g‘alla,
paxta va takroriy ekinlar ekiladigan maydaonlarning 35 foizi fermer
xo‘jaliklari hisobidagi nasos agregatlari orqali sug‘oriladi. Buning uchun
yiliga 19-20 mln.kVt/soat elektr energiya iste’mol qilinadi.
250 ta fermer xo‘jaliklari
1975-1980 yillarda ishlab chiqarilgan nasos agregatlaridan foydalanadi.
Natijada ularning elektr energiyasi iste’moli yuqori bo‘lib qolmoqda. Ushbu
holatlar inobatga olingan holda tumandagi "Islomobod", "Yigitali"
va "Shukrullo bobo nevarasi Shamshodbek" fermer xo‘jaliklarida
tajriba tariqasida yangi nasos agregatlaridan foydalanish holati kuzatildi.
Yangi va zamonaviy nasoslar
o‘rnatilishi orqali elektr sarfi 4 barobargacha kamaydi.
Seminar davomida
fermerlarga yangi nasos agregatlarining ishlashi va imkoniyatlari to‘liq
ko‘rsatildi va energiya tejamkor nasoslardan foydalanish, Quyosh panellarini
o‘rnatish bo‘yicha vazifalar belgilandi.
