O‘zbekiston Respublikasi Prezidentining 2021-yil 15-apreldagi “Ichki ishlar organlari uchun professional kadrlarni tayyorlashning sifat jihatidan yangi tizimini joriy etish bo‘yicha chora-tadbirlar to‘g‘risida”gi Qarori hamda O‘zbekiston Respublikasi IIVning 2021 yil 25 avgustdagi “Ichki ishlar vazirligi sohaviy xizmatlarining Akademiyada malakali mutaxassis kadrlarni tayyorlashdagi faoliyatini tizimli tashkil etish to‘g‘risida”gi buyrug‘iga muvofiq, IIV Akademiyasi professor-o‘qituvchilari, magistraturasi va kunduzgi ta’lim tinglovchilari bilan onlayn tarzda master-klass o‘quv mashg‘uloti o‘tkazildi.

Master – klass o‘quv mashg‘ulotida Qashqadaryo viloyati ichki ishlar boshqarmasi mas’ul xodimlarining “Mahalla yettiligi”, uning vazifalari, ular tomonidan huquqbuzarliklar va jinoyatlarni oldini olishda amalga oshirilayotgan profilaktik chora-tadbirlar”,   “Giyohvandlik vositalari yoki psixotrop moddalar bilan qonunga xilof ravishda muomala qilishdan iborat jinoyatlarni fosh etishda sohaviy xizmatlarning o‘zaro hamkorligi hamda unda yuzaga kelayotgan muammolar”, “Axborot texnologiyalari va internet tarmog‘idan foydalanib, sodir etilgan jinoyatlarni tergov qilishda tergovchining boshqa sohaviy xizmatlar bilan hamkorligi hamda ushbu sohada uchrayotgan muammolar yechimi”  mavzularidagi ma’ruzalari tinglandi.

Ochiq va o‘zaro muloqot ruhida o‘tgan master-klass o‘quv mashg‘ulotida ishtirokchilarni qiziqtirgan savollariga mutaxassislar tomonidan atroflicha javoblar berildi.