Ichki ishlar vaziri o‘rinbosari, polkovnik Ramazon Ashropov boshchiligidagi ishchi guruh jinoyatchilikni barvaqt oldini olish, huquqbuzarlikni sodir etishga sabab bo‘layotgan ijtimoiy-maishiy muammolarni ijtimoiy profilaktika choralari tizimi orqali hal etish hamda mahallalarda xavfsizlikni ta’minlashda amalga oshirilayotgan ishlarni o‘rganish maqsadida Qashqadaryo viloyatining shahar va tumanlarida o‘rganishlar olib bordi. 

Vazir o‘rinbosari, o‘rganishlar bo‘yicha viloyat IIB boshlig‘i, o‘rinbosarlar, sohaviy xizmatlar rahbarlari, shahar-tuman IIB boshliqlari va o‘rinbosarlari ishtirokida yig‘ilish o‘tkazdi. 

Yig‘ilishda Davlat rahbarining 2025 yil 3 yanvar kunidagi “2025 yilda respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yanada oshirish bo‘yicha chora-tadbirlar to‘g‘risida”gi Qarori, O‘zbekiston Respublikasi Bosh prokuraturasi va Ichki ishlar vazirligining 2025 yil 11 mart kunidagi “Jinoyatga oid ariza, xabar va boshqa ma’lumotlarni qabul qilish, ro‘yxatdan o‘tkazish hamda hal qilinishida protsessual qonunchilik talablariga rioya etilishini ta’minlash yuzasidan” Qo‘shma ko‘rsatmasi ijrosi bo‘yicha ishlab chiqilgan reja va unda biriktirilgan rahbarlar zimmasidagi mas’uliyatni bajarilish jarayoni, ko‘rsatilgan vazifalarni amaliyotga joriy etishning ustuvor yo‘nalishlari bo‘yicha mahallalarda “xavfsiz ko‘cha”, “xavfsiz yo‘lak”lar yaratish, mahallalarning kriminogen vaziyati og‘ir hududlarida yoritish va kameralashtirish ishlarini tahlil etdi.  

Bunda avvalo, mahallalarda fuqarolar va xotin-qizlarning turmush tarzi, xulq-atvori, oilaviy sharoiti, qobiliyati va kasbiy layoqatini o‘rgangan holda ularni tadbirkorlik, kasanachilik va hunarmandchilikka jalb qilish, zarur hollarda ijtimoiy-huquqiy, psixologik va moddiy yordam ko‘rsatish choralarini ko‘rish natijasida xotin qizlar o‘rtasida huquqbuzarliklarning barvaqt profilaktikasini ta’minlash jarayonlari ko‘zdan kechirildi. 

Jarayonda xotin-qizlar o‘rtasida qonunbuzarliklarni oldini olish, sodir etilganlarni fosh etish, ularni tazyiq va zo‘ravonlikdan himoya qilish, huquq va erkinliklarini ta’minlash borasida joylarda amalga oshirilayotgan ishlar tahlil etilib, tazyiq va zo‘ravonlikdan himoyalash chora-tadbirlarini kuchaytirish borasida mas’ullarning zimmasiga aniq vazifalar yuklatildi. Faoliyat davomida yo‘l qo‘yilgan kamchiliklar oshkora tanqid etilib, bartaraf etish yuzasidan mas’ullarga topshiriqlar berilib,ijrosi nazoratga olindi.

Shuningdek, joriy yilning mart oyida Qashqadaryo viloyati Ichki ishlar boshqarmasi xodimlarining ish faoliyatini kompleks tekshiruv natijasida aniqlangan xato va kamchiliklarni bartaraf etilganligi holati o‘rganilib, viloyat IIB soha xizmat rahbarlari va shahar-tuman IIB boshliqlariga kelgusida amalga oshirilishi lozim bo‘lgan ishlar yuzasidan topshiriqlar berildi.