Davlat rahbarining topshirig‘iga asosan, Qashqadaryo viloyatida fuqarolar osoyishtaligini ta’minlash, kriminogen vaziyatni jilovlash, qish mavsumida aholiga elektr, tabiiy va suyultirilgan gaz, ko‘mir  yetkazib berish hamda bunga mas’ul idora va tashkilotlar vakillarining mas’uliyatini oshirishga qaratilgan tadbirlar jadal amalga oshirilmoqda.

Yaqinda Qashqadaryo viloyati IIB boshlig‘i, polkovnik Abduvoxid Ismoilov soha mas’ullari hamda hamkor tashkilotlarning mutasaddilari bilan Qarshi shahridagi imkoniyati cheklangan bolalar maktabi, ko‘p qavatli uylarni issiqlik bilan ta’minlovchi qozonxona, Qarshi davlat universitetining isitish tizimini o‘rgandi.

O‘rganishlar davomida aniqlangan kamchilliklarni tez va sifatli bartaraf etish yuzasidan mutasaddilarga tegishli topshiriqlar berildi.

Qarshi shahar elektr tarmoqlari korxonasida bo‘lgan ishchi guruh aholini elektr energiya bilan barqaror ta’minlash bo‘yicha  chora-tadbirlar rejasi bilan tanishib, faoliyatda uchraydigan nosozliklarni tezda bartaraf etish yuzasidan smenadagi mas’ul xodimlarga tavsiyalar berildi.

Shu bilan birga shahardagi odamlar ko‘p to‘planadigan joylar, ko‘p qavatli uylar, jamoat joylarida video-kuzatuv qamrovini oshirish, kriminogen vaziyatni chuqur tahlil qilish, profilaktika inspektorlari tomonidan aholi muammolarni o‘rganish hamda bartaraf etish bo‘yicha “mahalla yettiligi” bilan yaqindan hamkorlikni yo‘lga qo‘yish mas’ulllar zimmasiga yuklandi.

Kunu tun har qanday vaziyatda ko‘ngilsiz hodisalarni oldini olish, jamoat tartibini saqlash borasida kuch va vositalarni to‘g‘ri yo‘naltirish, jinoyatlarni erta aniqlab oldini olish, sodir etilganlarini fosh etish borasida mas’ullarga topshiriqlar berdi.

Ishchi guruhning o‘rganishlari viloyat bo‘ylab davom etmoqda.