Ichki ishlar vazirligi Qashqadaryo akademik litseyida “Globallashuv davrida yoshlarni ma’naviy-ma’rifiy va axloqiy tarbiyalash, ularda vatanparvarlik ruhini shakllantirish: nazariya va amaliyot” mavzusida Respublika ilmiy-amaliy konferensiyasi bo‘lib o‘tdi. Ushbu ilmiy-amaliy konferensiyada Plexanov nomidagi Rossiya iqtisodiyot universiteti prorektori, professor Nazar Xakimov, Qarshi davlat universiteti o‘qituvchilari, professor Boynazar Yo‘ldoshev, dotsent Asror Pardayev, Xalqaro “Oltin meros” fondi Qashqadaryo viloyati boshqaruv raisi, yozuvchi Sharofat Ashurova, Nuriston akademik litsey direktori, Psixologiya fanlari bo‘yicha falsafa doktori, (PhD) Akmaljon Qudratov, Respublika Ma’naviyat va ma’rifat markazi Qashqadaryo viloyat bo‘limi rahbari  Komila Karamova, mahalliy boshqaruv va huquqni muhofaza qiluvchi organlar, viloyat ma’naviyat va targ‘ibot markazi, viloyatimizdagi akademik litseylarning ma’naviy-ma’rifiy ishlar bo‘yicha direktor o‘rinbosarlari, olimlar, ijodkorlar, litseyimiz o‘qituvchilari hamda o‘quvchilar ishtirok etdi.

Tadbirda so‘z olganlar O‘zbekiston Respublikasi Prezidentining “ O‘zbekiston Respublikasida yoshlarga oid davlat siyosatini amalga oshirishga qaratilgan qo‘shimcha chora tadbirlar to‘g‘risida” gi PQ-2124 sonli Qarori va “Yoshlar va biznesni qo‘llab quvvatlash yili” Davlat dasturida belgilangan vazifalarni amalga oshirishda globallashuv davrida yoshlarni ma’naviy-ma’rifiy va axloqiy tarbiyalash, ularga vatanparvarlik ruhini singdirish lozimligini ta’kidlashdi.

Respublika ilmiy-amaliy anjumanida yoshlarga milliy-ma’naviy qadriyatlar ahamiyatini singdirish, ma’naviy qashshoqlashuvning oqibatlari haqida tegishli nazariya va amaliy bilimlarni tahlil qilish orqali ogoh bo‘lish ruhiyatini shakllantirish borasida ham atroflicha tushunchalar berishdi.

Mustaqillik yillarida mamlakatimizda milliy –ma’naviy tiklanish borasida amalga oshirilgan islohotlar va erishilgan yutuqlar, “Ommaviy madaniyat” va turli oqimlarning maqsad va muddaolaridan yoshlar ogoh bo‘lishi, ular ongi va dunyoqarashida ma’naviy immunitetni shakllantirish hamda boshqa dolzarb masaslalar xususida ilmiy-tahliliy mulohazalar ishtirokchilar e’tiboriga yetkazildi.