Mamlakatimizda sayyohlarga xizmat ko‘rsatish tizimini tubdan yaxshilash, qulay hamda sifatli davlat xizmatlarini ko‘rsatishni yanada kengaytirish bo‘yicha tizimli islohotlar amalga oshirilmoqda. Shunga ko‘ra, Vazirlar Mahkamasining “Malaka sertifikatlarini berish bo‘yicha davlat xizmatlari ko‘rsatishni tartibga soluvchi normativ-huquqiy hujjatlarni tizimlashtirish to‘g‘risida”gi 2023-yil 30-noyabrdagi 635-son qarori bilan “Gid (gid-tarjimon), ekskursiya yetakchisi va yo‘riqchi-yo‘l boshlovchilarga malaka sertifikatini berish pasporti” hamda 2024-yildan boshlab malaka sertifikatini berish uchun malaka imtihonini o‘tkazish tartibi tasdiqlangan.

Yuqoridagilarga asosan, xorijiy va mahalliy turistlarga sifatli xizmat ko‘rsatish, turistlarning huquqlari, erkinliklari va qonuniy manfaatlarini himoya qilish hamda qaror ijrosini ta’minlash maqsadida, viloyat IIB Xavfsiz turizmni ta’minlash boshqarmasi xodimlari tomonidan hozirda ayrim shaxslarning turizm namoyishi obyektlari va ularga tutash xududlarda tegishli malaka sertifikatisiz gid, ekskursiya yetakchisi va yo‘riqchi-yo‘l boshlovchilik faoliyati bilan shug‘ullanib kelayotganlik holatlarini aniqlash bo‘yicha manzilli profilaktik tadbirlar o‘tkazilib kelinmoqda.

Shuningdek, gid faoliyati bilan shug‘ullanuvchi shaxslarning ro‘yxati qayta taftishdan o‘tkazilgan holda yangidan ro‘yxatlari shakllantirilib, unda nechta shaxsda tegishli malaka sertifikati borligi, nechtasi sertifikatisiz faoliyat bilan shug‘ullanib kelayotganligiga aniqlik kiritildi, qaror mazmunini ushbu faoliyat bilan shug‘ullanuvchi shaxslarga yetkazish maqsadida uchrashuv o‘tkazilib, malaka sertifikatiga ega bo‘lmasdan shug‘ullanganlik uchun qonun hujjatlarida nazarda tutilgan javobgarlikka tortilishlari to‘g‘risida to‘liq profilaktik tushuntirish ishlari olib borildi, bundan tashqari, tegishli malaka sertifikatisiz faoliyat bilan shug‘ullanib kelayotgan shaxslar tomonidan qonunchilik talablari buzilishining oldini olish hamda kelgusida bunday holatlarga yo‘l qo‘ymaslik maqsadida tegishli davlat organlari, idora va tashkilotlarga o‘z vaqtida taklif va taqdimnomalar kiritib borilmoqda.