Shahrisabz tumani “Shanbe” MFY da sodir etilgan oila-turmush doirasidagi jinoyat muhokamasi bo‘lib o‘tdi. Unda viloyat 3-sektor rahbari - ichki ishlar boshqarmasi boshlig‘i polkovnik Abduvoxid Ismoilov, tuman hokimi, prokurori, ichki ishlar, sog‘liqni saqlash bo‘limlari boshliqlari,  mutasaddi idoralar hamda “Shanbe” mahallasi yettiligi va faollari ishtirok etishdi.

Muhokama yig‘ilishida so‘z olgan viloyat ichki ishlar boshqarmasi boshlig‘i polkovnik Abduvoxid Ismoilov jinoyatni yuzaga keltirgan shart-sharoit va omillarni atroflicha tahlil etdi.

Davolanishga muhtoj fuqaro oila-turmush doirasida mudhish jinoyatga qo‘l urgani, o‘z navbatida bu holatga tibbiyot sohasi mutasaddilari o‘z vazifasiga mas’uliyatsizlik qaragani oqibatida sabab bo‘lganini ta’kidladi. Qolaversa, qarindoshlar hamda mahalla yettiligi ham “xonadonbay” o‘rganishlar davomida bu holatni e’tibordan chetda qoldirgani tanqid ostiga olindi.

Odatda mahallada kimning  qanday hayot kechirayotgani, ijtimoiy ahvoli, nima ish bilan mashg‘ulligi, ruhiyatidagi o‘zgarishlarni faollari yaxshi bilishi lozim. Lekin  vaqtida tibbiy profilaktik choralarni amalga oshirmagani, o‘zibularchilikka berilish mana shunday salbiy oqibatni yuzaga keltirgan.

Agarda har bir fuqaro ogoh va hushyor bo‘lib, atrof-tevarakda kechayotgan holatlarga daxldorlik hissi bilan yashaganda, mahalla yettiligi va jinoyatni sodir etgan shaxsning ota-onasi bu holatni vaqtida muhokama etib,  profilaktik chora-tadbirlarni amalga oshirganda bu mudhish jinoyatning oldi olinishi mumkin edi.

Holat bo‘yicha tuman sektor rahbarlari, tibbiyot sohasi mutasaddilari va “Shanbe” mahalla fuqarolar yig‘ini yettiligi zimmasiga kelgusida bu kabi jinoyatlarning oldini olish va kelgusida amalga oshirilishi lozim bo‘lgan chora-tadbirlar vazifasi yuklandi.