YUNESKO Butunjahon merosi ro‘yxatiga kiritilgan Shahrisabz shahri - “2024 yil – IHT turizm poytaxti” sifatida e’lon qilinib, joriy yil 25-26 aprel kunlari tashkilotga a’zo davlatlar a’zolari ishtirokida xalqaro forum bo‘lib o‘tdi.

Iqtisodiy hamkorlik tashkiloti bosh kotibi Husrav Noziriy boshchiligida Turkiya, Eron, Tojikiston, Pokiston, Qirg‘iziston, Qozog‘iston, Turkmaniston va Ozarbayjon mamlakatlaridan kelgan mehmonlar va tadbir ishtirokchilari Shahrisabz shahrining  “Dor ut-Tilovat”, Dor ut-Siyodat”, “Oqsaroy” majmualari, Chubin madrasida joylashgan Amir Temur va Temuriylar davriga oid muzey, Amir Temur monumenti kabi boshqa tarixiy obidalarga tashrif buyurishdi.

Shundan so‘ng mehmonlar “Shahrisabz – Iqtisodiy hamkorlik tashkiloti turizm poytaxti” mavzusida a’zo davlatlarning yetakchi rassomlari ishtirokida “plener” natijalariga bag‘ishlangan 9 ta davlatning 22 nafar taniqli rassomlari ishtirokida ko‘rgazmani ko‘zdan kechirishdi.

  “Shakhrisabz Culinary Competition” – IHTga a’zo davlatlar oshpazlari o‘rtasida xalqaro gastronomik festivalda 30 dan ortiq oshpazlar o‘z davlatlarining o‘ziga xos milliy taomlari bilan qatnashishdi.

Ikkinchi kuni “International folk” xalqaro festivali doirasida tarixiy markaz hududida 9 ta davlat folklor jamoalarining hamda viloyatning folklor jamoalari tomonidan turli chiqishlar amalga oshirildi.

Shundan so‘ng “IHT davlatlari “Xalqaro etnosport birinchi o‘yinlari”ga start berildi. Festivalga har bir davlatdan 4 ta etnosport turi bo‘yicha sportchilar qatnashishdi.

Shu kuni Shahrisabz shahriga 2024 yilda “Iqtisodiy hamkorlik tashkiloti turizm poytaxti” maqomi  sertifikati tantanali ravishda topshirildi.

IHTga a’zo mamlakatlar yosh dizaynerlari ishtirokida “Modest fashion show” va sahnalashtirilgan madaniy konsert dasturi namoyish etildi.

Xalqaro festival ishtirokchilari, xorijiy va mahalliy  jurnalistlar Shahrisabz tumanida bunyod etilayotgan turistik markaz faoliyati hamda yangi loyihalar bilan tanishish maqsadida “Miraki” shaharchasiga tashrif buyurishdi.

Turizm haftaligi doirasida tashkil etilgan xalqaro anjuman tashkilotchilari va boshqa vakillar, xorijiy hamda mahalliy jurnalistlar so‘lim, bahavo “Miraki” mahallasida tashkil etilgan sayyohlik imkoniyatlari bilan tanishishdi.

“Turizm haftaligi” doirasida eng yaxshi faoliyati olib borgan “Miraki” mahalla fuqarolar yig‘ini raisiga O‘zbekiston Respublikasi Turizm qo‘mitasining “Turizm mahallasi” maqomi sertifikati tantanali ravishda topshirildi.

Shu bilan Shahrisabz shahri - “2024 yil – IHT turizm poytaxti” maqomi doirasida xalqaro tadbirlar yakunlandi.

Xalqaro iqtisodiy va madaniy tadbirga tashrif buyurgan 416 nafar xorijiy va 29.000 dan ortiq xorijiy va mahalliy ishtirokchilar, sayyohlar, delegatsiya a’zolarini xavfsizligini namunali ta’minlandi.

Xizmatga viloyat IIB Xavfsiz turizmni ta’minlash boshqarmasi shaxsiy tarkibi to‘liq jalb qilinib, xodimlar tomonidan tadbirlar o‘tkaziladigan joylarda tashrif buyurgan ishtirokchilar, xorijiy va mahalliy sayyohlarga turli yo‘nalishlarda amaliy yordam ko‘rsatish, ularning harakat yo‘nalishlarida patrullik kuzatuvini ta’minlash kabi bir qator vazifalar amalga oshirildi.

Ichki ishlar organlari boshqa huquqni muhofaza qiluvchi idoralar xodimlari tomonidan olib borilgan fidokorona xizmat davomida xorijiy va mahalliy fuqarolarga nisbatan yoki ular tomonidan jinoyat sodir etilishiga yo‘l qo‘yilmadi, shuningdek, ko‘ngilsiz voqea-hodisalar qayd etilmadi.