IIV huzuridagi Tergov departamentining tegishli ko‘rsatmasiga asosan, Kimyo-texnologiya instituti Shahrisabz filialida Qashqadaryo viloyati IIB huzuridagi Tergov  boshqarmasi tashabbusi bilan tergov sifatini oshirish, jinoyat ishlarini har tomonlama, to‘la va xolisona tergov qilish, tergov faoliyatida yo‘l qo‘yilayotgan kamchiliklarning oldini olish maqsadida hamkorlikda o‘quv-seminari tashkil etildi.

Tadbirda Shahrisabz shahar, Kitob, Chiroqchi, Yakkabog‘, Qamashi, G‘uzor va Shahrisabz tuman ichki ishlar bo‘limi huzuridagi tergov bo‘linmalari tergovchilari, ekspert-kriminalistlar, prokuratura, jinoyat ishlari bo‘yicha sudlar hamda advokatlar ishtirok etishdi.

O‘quv seminarida Tergov boshqarmasining malakali tergovchilari tomonidan “Yo‘l-transport hodisalari bilan bog‘liq jinoyatlar bo‘yicha hodisa joyini ko‘zdan kechirish hamda hodisa joyi chizmasini rasmiylashtirish tartibi, bu turdagi jinoyatlarni tergov qilishning o‘ziga xos xususiyatlari, tayinlanadigan ekspertizalar turlari, amaliyotda yuzaga kelayotgan muammolar” mavzusida o‘quv darsi o‘tildi.

Shuningdek, muqaddam tergov qilingan ishlar bo‘yicha chiqarilgan oqlov hukmi, sudlardan JPKning 416,417-moddalari tartibida kelib tushgan ajrimlar, prokuratura va suddan jinoyat ishlarni qo‘shimcha tergovga qaytarilishi, xususiy ajrimlar, prokuratura organlaridan taqdimnomalar kiritilishi va intizomiy ish qo‘zg‘atish kabi salbiy holatlar muhokama qilinib, kelgusida bu kamchiliklarga yo‘l qo‘ymaslik bo‘yicha tushuntirishlar berildi.