Qashqadaryo viloyati IIBda IIV Akademiyasi professor-o‘qituvchilari tomonidan 1 va 2-kurs kursantlari uchun tanishuv va ish o‘rganish amaliyoti yuzasidan davra suhbati tashkil etildi. Tadbirda so‘nggi uch yilda Akademiyani bitirgan, hozirda viloyatda faoliyat yuritayotgan yosh xodimlar ham ishtirok etdi.

Ochiq muloqotda so‘z olganlar Akademiyadagi ta’lim jarayoni, nazariya va amaliyot uyg‘unligini ta’kidlab, ichki ishlar organlari uchun malakali kadrlar tayyorlash borasidagi amalga oshirilayotgan chora-tadbirlar, islohotlar haqida ishtirokchilarga ma’lumotlar berishdi.

Keng ko‘lamli tadbirda 2021-2023 yillarda Akademiyani bitirgan xodimlar faoliyati tahlil qilinib, ularning amaliyotdagi muammolari muhokama etildi. Akademiyada o‘quv jarayonini amaliyot bilan uyg‘unlashtirish va kursantlarning bilim hamda ko‘nikmalarini rivojlantirish bo‘yicha ichki ishlar organlari xodimlari takliflar bildirishdi.

Tadbirda kursantlar amaliyot dasturiga qat’iy amal qilishi, berilgan vazifalarni o‘z vaqtida bajarish va qonunchilikka rioya etishi ta’kidlandi.

Shuningdek, ular bilan Akademiyadagi ta’lim jarayonini takomillashtirish va kun tartibini samarali tashkil etish yuzasidan test monitoringi o‘tkazildi.

Yakunda Akademiya tomonidan ichki ishlar organlari faoliyatini uslubiy ta’minlash uchun yaratilgan hudud metodikalari, jinoyatchilikka qarshi kurashish bo‘yicha qo‘llanmalar va media mahsulotlar namoyish etildi.