Sarxush avtomashina boshqarish jinoyatga yetakladi

Spirtli ichimlik iste’mol qilib, nojo‘ya xatti-harakatlar sodir etish huquqbuzarlik yoki jinoyatni yuzaga keltiradi. Shu bois qonunda ham, dinda ham spirtli ichimlik iste’mol qilish qoralanadi. Jumladan, Yakkabog‘ tumanida yashovchi fuqaro M.J. boshqaruvida bo‘lgan “Damas” rusumli avtomashinasini “Yakkabog‘-Shahrisabz” yo‘nalishida boshqarib kelayotganda Shahrisabz tuman IIB JXX YHXB inspektori tomonidan to‘xtatildi.

Suhbat davomida  haydovchidan spirtli ichimlik hidi kelganligi bois YPX inspektori uni narkolog shifokor ko‘rigida o‘tishga taklif etadi. Natijada haydovchida alkogoldan mastlik holati aniqlanib, ma’muriy bayonnoma rasmiylashtirilib, transport vositasi jarima maydoniga joylashtirilgan.

Oradan uch kun o‘tib, haydovchi Shahrisabz tuman IIB YHXB boshlig‘iga uchrashib, suhbat asnosida aybini yopish va haydovchilik guvohnomasini qaytarib olish evaziga 1000 AQSH dollari miqdorida pora taklif qildi.

Shahrisabz tuman IIB YHXB boshlig‘i unga bu xatti-harakati jinoyatga sabab bo‘lishini tushuntirsa-da haydovchi unamaydi.

Natijada  Shahrisabz tuman IIB YHXB boshlig‘iga haydovchi 200 AQSH dollarini pora tariqasida bergan vaqtida ushlanib, protsessual hujjatlar rasmiylashtirilgan.

Huquqbuzarligi jinoyatga yetaklagan haydovchi endi qilmishining mohiyatini tushunib yetishi tayin.