Xodimlarning kasbiy, jismoniy va jangovar tayyorgarligini oshirish borasida Qashqadaryo viloyati ichki ishlar boshqarmasida bir qator sport musobaqalari uyushtirib kelinmoqda. Jumladan, yaqinda Qarshi shahrida boshqarma tarkibiy bo‘limlari va sohaviy xizmatlari hamda shahar-tuman ichki ishlar bo‘limlari xodimlari hamda xodimalari o‘rtasida sportning shaxmat va shashka turi bo‘yicha musobaqa bo‘lib o‘tdi.

Qizg‘in va murosasiz kechgan aql charxi musobaqalarida ishtirokchilar bor mahorat va tajribalarini ishga solib g‘oliblik uchun kurashdilar.

Musobaqaning shaxmat turi bo‘yicha 1-o‘rinni Qarshi shahar bo‘yicha Ichki ishlar organlari faoliyatini muvofiqlashtirish boshqarmasi 3-son ichki ishlar bo‘limi huquqbuzarliklar profilaktikasi guruhi profilaktika inspektori, leytenant Jahongir Hajilov qo‘lga kiritdi.

Navbatdagi sovrinli o‘rinlarni G‘uzor tumani ichki ishlar bo‘limi Jamoat xavfsizligi xizmati huquqbuzarliklar profilaktikasi bo‘linmasi profilaktika inspektori, leytenant Ismoil Jonimqulov va Mirishkor tumani ichki ishlar bo‘limi Jamoat xavfsizligi xizmati huquqbuzarliklar profilaktikasi bo‘linmasi profilaktika inspektori, leytenant Tojiddin Buriyev band etishdi.

Xotin-qizlar o‘rtasida bo‘lib o‘tgan shashka musobaqalarida G‘uzor tumani Ichki ishlar bo‘limi huquqbuzarliklar profilaktikasi bo‘linmasi xotin-qizlar masalalari bo‘yicha katta inspektori mayor Munira Toshniyozova barcha raqiblaridan ustunligini namoyish etib, g‘oliblik shohsupasidan joy oldi. Boshqarma Tezkor vazifalarni bajaruvchi safarbar otryadi ikkinchi ishg‘ol qilish guruhi katta mutaxassis-o‘qchisi, kichik serjant Zuxra Bozorova 2-o‘rinni, Qarshi tuman ichki ishlar bo‘limi huzuridagi Tergov guruhi tergovchisi leytenant Kamola Umarova 3-o‘rinni qo‘lga kiritdi.

G‘oliblar boshqarma rahbariyatining diplomi va qimmatbaho sovg‘alari bilan taqdirlandi.