Yurtimizda bahor boshlandi. Ona tabiat uyg‘onib, atrofni yashilikka burkamoqda. Yasharish va yangilanish ayyomining boshlanishi 8 mart - Xalqaro xotin-qizlar kuni bilan yanada o‘zgacha uyg‘unlashib, dillarga farahbaxshlik ulashmoqda. 

Shu kezlarda barcha joylarda bo‘lgani kabi Qashqadaryo viloyati IIBda ham 8 mart – Xalqaro xotin –qizlar kuniga bag‘ishlangan tantanali tadbir bo‘lib o‘tdi. Go‘zallik va nafosat ayyomiga bag‘ishlangan bayram tadbiriga boshqarma soha xizmatlarida faoliyat yuritayotgan barcha xotin-qizlar, faxriy onaxonlar va xizmat burchini bajarish chog‘ida halok bo‘lgan xodimlarning oila a’zolari taklif etildi.

Tadbirni boshqarma boshlig‘i, polkovnik Abduvoxid Ismoilov ochib, Ichki ishlar vazirining soha malikalariga yo‘llagan bayram tabrigini o‘qib eshittirdi. Ichki ishlar organlarining turli sohalarida osoyishtalik barqarorligini  mustahkamlash yo‘lida xizmat qilayotgan xotin - qizlarni ezgulik, go‘zallik, mehru muhabbat ayyomi bilan muborakbod etdi. El osoyishtaligini ta’minlashda erkaklar bilan yelkama-yelka turib xizmat qilayotgan bir guruh xotin-qizlarga Ichki ishlar vazirligining  “A’lo xizmatlari uchun”, II-III-darajali “Benuqson xizmatlari uchun” ko‘krak nishonlari, Faxriy yorliq va qo‘l soati, navbatdagi maxsus unvon hamda pul mukofotlari va qimmatbaho sovg‘alarini topshirildi.

- Mamlakatimizda xotin-qizlarga bo‘lgan hurmat va ehtirom nihoyatda ortdi, - deydi boshqarma Ma’naviy-ma’rifiy ishlar va kadrlar bilan ta’minlash xizmati boshlig‘i o‘rinbosari, podpolkovnik Zarina Kenjayeva. –xotin-qizlarga yaratilgan imkoniyatlar, jamiyatda ayollarning faolligini oshirish, tadbirkorlik va ishbilarmonlik sohalarida o‘z iqtidorlarini namoyon etishi uchun yaratilgan shart-sharoitlarni sanab adog‘iga yetish qiyin. O‘z navbatida xotin-qizlar ham ichki ishlar organlarida erkaklar bilan yelkama-yelka xizmat qilib, yurt koriga kamarbasta bo‘lmoqda.  

Bayram tadbiri Qarshi shahridagi «Asl» choyxonasida bir piyola choy ustida davom etdi. Unda ishtirok etgan bir guruh viloyat san’atkorlari tomonidan ijro etilgan kuy-qo‘shiqlar tadbirga o‘zgacha fayz bag‘ishladi.