Qashqadaryo viloyati Ichki ishlar boshqarmasida joriy yilning o‘tgan davrida kriminogen vaziyatni jilovlash, huquqbuzarliklar va jinoyatlarni oldini olish, sodir etilganlarini fosh etish borasida ichki ishlar organlari xodimlari tomonidan amalga oshirilgan ishlar tahliliga bag‘ishlangan yig‘ilish bo‘lib o‘tdi. Unda boshqarma tezkor va sohaviy xizmatlar, shahar-tuman IIB boshliqlari va o‘rinbosarlari ishtirok etishdi.

Ko‘lam keng yig‘ilishni viloyat IIB boshlig‘i polkovnik Shuhratjon Satvoldiyev ochib, amaldagi yilning o‘tgan davrida viloyatda jamoat tartibini saqlash, jinoyatchilikka qarshi kurashish va uning oldini olish, sodir etilgan jinoyatlarni “issiq izlar”da fosh etish, fuqarolar xavfsizligini ta’minlash borasida amalga oshirilgan ishlarni atroflicha tanqidiy-tahlil etdi.  Jinoyatlarni fosh etishda tezkor va sohaviy xizmatlar xodimlarining boshqa huquqni muhofaza qiluvchi idoralar hamda keng jamoatchilik bilan o‘zaro hamkorlikdagi faoliyatini yanada kuchaytirish lozimligi ishtirokchilarga uqtirildi.

Viloyatda jamoat tartibini saqlash, huquqbuzarliklar va jinoyatlarni oldini olish borasida sustkashlikka yo‘l qo‘ygani uchun bir guruh mas’ul xodimlar ogohlantirilib, bu boradagi ishlarni yanada jadallashtirish borasida tegishli sohaviy xizmatlar rahbarlari vazifador etilib, mas’uliyati oshirildi.

Faoliyat davomida tobora yaqinlashib kelayotgan Yangi yil bayramini tinch-osuda o‘tkazish, jinoyatlarni erta aniqlab oldini olish, jamoat tartibini saqlash, pirotexnika vositalari savdosi va turli ko‘ngilochar tadbirlarda poqildoqlardan foydalanishni oldini olish lozimligi, qish-kuz mavsumini betalofat o‘tkazish, bu boradagi ishlarni yanada jadallashtirish  yig‘ilish ishtirokchilariga tushuntirildi.  

Kengaytirilgan yig‘ilishda yo‘l qo‘yilgan kamchiliklar muhokama etilib, kun tartibiga kiritilgan masalalar yuzasidan tegishli qaror qabul qilindi.