Assalomu alaykum,

Hurmatli  hamkasblar !

O‘z hayotini Vatan himoyasi, el osoyishtaligi, yurt tinchligini ta’minlashdek ulug‘ ishga bag‘ishlagan siz, azmu shijoatli ichki ishlar organlari xodimlarini, barcha faxriylarimizni hamda ularning oila-a’zolarini O‘zbekiston Respublikasi davlat mustaqilligining
33 yillik bayrami bilan samimiy muborakbod etaman.

Muhtaram Prezidentimiz tashabbuslari bilan ichki ishlar organlarida amalga oshirilgan tizimli islohotlar natijasida xalq manfaatlariga xizmat qiladigan, eng asosiysi, mamlakatimizdagi tinchlik va osoyishtalikning kafolati bo‘la oladigan yangi tizim yaratilib, amalda o‘z natijasini ko‘rsatmoqda.

Bunday yutuqlarning birinchi omili sifatida xalqimizning tinch-xotirjam va osoyishta hayot kechirishi uchun mashaqqatli va mas’uliyatli ishni sharaf bilan ado etayotgan ichki ishlar organlari xodimlarining xizmatini e’tirof etmasdan bo‘lmaydi.

Xodimlarimiz kunlarni tunlarga ulab, kriminogen vaziyatni jilovlash, jinoyatlarni oldini olish, fosh etish, jamiyatda qonun ustuvorligini ta’minlash, jamoat tartibini saqlash, fuqarolar xavfsizligini ta’minlashdek vazifalarni sadoqat bilan bajarib kelmoqdalar.

Bugungi kunda yurtimizda “Inson qadri uchun” shiori asosida amalga oshirilayotgan ishlar dunyo jamoatchiligi e’tirofiga sazovor bo‘lmoqda. Ayniqsa, bu Ichki ishlar organlari tizimida ham asosiy maqsadga aylangan. 

O‘z navbatida ichki ishlar organlari xodimlarining xizmati hukumatimiz va vazirlik rahbariyati tomonidan munosib rag‘batlantirib kelinmoqda.

Muhtaram Prezidentimizning sohaga bo‘lgan e’tiborlari natijasida xodimlarga munosib shart-sharoitlar yaratish, ularni qo‘llab-quvvatlash borasida joriy yilda bir qator ishlar amalga oshirildi.

Yaratilayotgan shart-sharoitlarga javoban, xodimlarimiz tomonidan yurtimiz va xalqaro miqyosda o‘tkazilayotgan sport musobaqalarida yuqori natijalarga erishilmoqda.

Hususan,

- “Eng namunali Vatanparvarlik burchagi” ko‘rik-tanlovining Respublika bosqichida Qarshi tumani ichki ishlar bo‘limi faxrli 2-o‘rinni band etdi.

- shu kunga qadar xodimlarimiz 6 marotaba Respublika va 3 marotaba jahon chempionati sport musobaqalarida yuqori natijalarga erishib, g‘olib va sovrindorlar qatoridan o‘rin egalladilar.

- joriy yilning aprel oyida viloyat Huquqni muhofaza qiluvchi organlari shaxsiy tarkibi o‘rtasida sportning “Sambo” turi bo‘yicha bo‘lib o‘tgan musobaqada Viloyat IIB jamoasi faxrli 1-o‘rinni egalladilar.

- joriy yilning 13-17-avgust kunlari xodimalarimiz Buxoro shahrida Vazirlik tarkibiy va hududiy bo‘linmalari ayol harbiy xizmatchi va xodimalari o‘rtasida “To‘maris izdoshlari” Respublika musobaqasida faol ishtirok etib, 18 ta jamoa orasida faxrli 2-o‘rinni qo‘lga kiritdilar.

Aziz hamkasblar !

Vatan uchun, uning taraqqiyoti, tinchligi, obodligi va barqarorligi hamda xalqimiz farovonligi yo‘lida qilingan xizmat hech qachon unutilmaydi.

Shu bois, barchangizga olib borayotgan ushbu mas’uliyatli va sharafli ishlaringizda ulkan zafarlar tilayman. Oilaviy baxt, sihat-salomatlik, uzoq umr, dasturxoningiz-dagi qut-baraka Sizlarni xech qachon tark etmasin.

Go‘zal va betakror yurtimiz hamisha tinch va farovon, osmonimiz doimo musaffo bo‘lsin !

Qashqadaryo viloyati Ichki ishlar boshqarmasi boshlig‘i polkovnik Ismoilov Abduvoxid Salomovich