9-may – Xotira va qadrlash kuniga bagʼishlangan tantanali tadbirlar boʼlib oʼtdi
9-may Xotira va Qadrlash kuni tarzida umumxalq bayrami sifatida nishonlab kelayotganimiz zamirida ham aynan ana shu ezgu maqsad yotibdi. Qashqadaryo viloyati Qarshi shahridagi Motamsaro ona haykali maydonida ham bugungi nurafshon xotirjamlikni bizga baxshida etgan ajdodlarimiz yodga olindi.
Viloyat xokimligi va huquqtartibot organlari, vatan himoyachilari jam boʼlgan maydon uzra harbiy orkestr tomonidan gʼalaba va xotira kuylari sadosi ostida Motamsaro ona haykali poyiga gulchambarlar qoʼyildi. Garchi qaddi bukilgan boʼlsada, bugungi yorugʼ kunlardan, tinchlik va osoyishtalikdan, atrofi gulchambarlarga toʼlib, goʼyoki parishon onaning huzuri bayramona koʼrinish oldi.
Ona Vatan oldida ajdodlar xizmati eʼtirof etilib, ularning ruhi yodga olindi. Xotira va Qadr hech qachon eskirmaydigan tuygʼu. Bu soʼzlar zamirida insonga, uning qadr-qimmatiga, shaʼniga, xotirasiga ehtirom mujjassamdir. Inson bor ekan, xotira quyoshi abadiy nur sochaveradi.
Qashqadaryo viloyat IIB Аxborot xizmati
