26 iyun –Xalqaro giyohvandlikka qarshi kurashish kuni
TАDBIR SАMАRАLI OʼTDI
Toshkent Аxborot texnologiyalari universiteti Qarshi filialida 26 iyunь –Xalqaro giyohvandlikka qarshi kurashish kuni munosabati tadbir boʼlib oʼtdi. Unda viloyat IIB, viloyat OITSga qarshi kurashish markazi va universitet oʼqituvchilari hamda talabalari ishtirok etdi.
Tadbirda viloyat IIB JQB Giyohvandlik vositalari bilan qonunga xilof ravishda muomila qilishga qarshi kurash boʼlimi katta tezkor vakili podpolkovnik Sobir Usmonov soʼzga chiqib, giyohvandlik – asr vabosi, inson tafakkuri kushandasi ekanligini, shu bois giyohvand moddalarni yetishtirish, sotish, tashish va saqlashning oldini olishga barcha oʼz hissasini qoʼshishi lozimligini taʼkidladi. Yurtimizda ham bu borada bir qator ibratga molik ishlar amalga oshirib kelinayotir. Jumladan, ichki ishlar organlari xodimlari tomonidan har yili ikki bosqichda oʼtkazib kelinayotgan “Qoradori” tezkor profilaktik tadbiri ham ana shu boradagi saʼy-harakatlarning bir debochasidir.
Kelajagimiz vorislari boʼlmish yoshlarni bu kabi jirkanch illatlardan himoya qilish, giyohvandlikning jirkanch oqibatlarini ular ongiga chuqurroq singdirish har bir fuqaroning insoniy burchi. Аna shu jihatlarni hisobga olgan holda viloyatimizda faoliyat yuritayotgan oliy va oʼrta maxsus kasb-hunar kollejlari hamda maktablarda taʼlim olayotgan yoshlar oʼrtasida “Narkotik moddalarga qarshi kurashish barchani burchi”, “Zulmatga eltuvchi yoʼl”, kabi mavzularda uchrashuvlar oʼtkazilmoqda. Unda viloyat hokimligi voyaga yetmaganlar bilan ishlash komissiyasi, Yoshlar ittifoqi, Yoshlar ishlari agentligi, Mahalla va oilani qoʼllab-quvatlash boʼlimi, sogʼliqni saqlash, Xalq taʼlimi, huquq-tartibot idoralari va boshqa mutassadi tashkilot vakillari bevosita ishtiroki taʼminlanmoqda.
Tadbir yakunida yoshlar ishtirokida “Biz giyohvandlikka qarshi va OITS boʼlmagan hayotni tanlaymiz” shiori ostida sportchi va harbiylar hamda Milliy gvardiya va ichki ishlar organlari sohaviy xizmatlari xodimlari ishtirokida marafon oʼtkazildi.
