Qashqadaryo viloyati Ichki ishlar boshqarmasi

boshlig‘i polkovnik

Abduvoxid Salomovich Ismoilovning

1 oktabr – O‘qituvchi va murabbiylar kuni munosabati bilan bayram tabrigi

Muhtaram ustozlar va murabbiylar!

Barcha ichki ishlar organlari tizimida fidokorona xizmat qilayotgan ustoz-murabbiylarni, faxriylarini hamda ta’lim muassasasi o‘qituvchilarini 1 oktabr – O‘qituvchi va murabbiylar kuni bayrami munosabati bilan samimiy muborakbod etaman.

Xalqimiz azal-azaldan ustoz-murabbiylarni  mo‘tabar va tabarruk zot sifatida e’zozlab kelgan.

Barcha sohalardagi kabi ichki ishlar organlarida ham ushbu bayram keng nishonlanishi bejiz emas.

Ichki ishlar organlarida faoliyat yuritayotgan ustoz va murabbiylarimiz yosh xodimlarni har tomonlama barkamol qilib tarbiyalash, ularga kasb sirlarini o‘rgatish, vatanparvar, mard va jasurlik xislatlarini singdirishdek mas’uliyatli vazifani sharaf bilan ado etib kelmoqda.

Jumladan, muhtaram Prezidentimizning kuni kecha ustoz va murabbiylarga yo‘llagan tabrigida “Xalqimiz o‘zining azmu shijoati, bunyodkorlik salohiyati bilan Yangi O‘zbekiston va Uchinchi Renessans poydevorini barpo etayotgan bugungi kunda ushbu ulug‘ ayyomning mohiyati, muallim va ustozlarning jamiyatimiz hayotidagi o‘rni va ahamiyati ayniqsa ortib bormoqda” deya bejizga ta’kidlamadilar.

Mamlakatimizda ta’limga, o‘qituvchi va murabbiylarga ko‘rsatilayotgan bunday yuksak e’tibor, o‘z navbatida farzandlarimizni buyuk ajdodlarimizga munosib, zamonaviy bilim va kasb-hunarlarni mukammal egallagan, eng asosiysi, ona vatanimiz taraqqiyoti yo‘lida sadoqat bilan xizmat qilishiga zamin yaratishi shubhasiz.

Ichki ishlar tizimida faoliyat ko‘rsatayotgan aziz ustoz-murabbiylarimiz o‘zining bor kuch va salohiyatini, bilim va tajribasini safarbar etib, yurtimizda amalga oshirilayotgan islohotlarga kamarbasta bo‘lishlariga ishonamiz.

Fursatdan foydalanib, ichki ishlar organlarida yoshlarga zamonaviy talablar asosida bilim berish, ularda yuksak ma’naviy-axloqiy fazilatlarni kamol toptirish ishlariga ulkan hissa qo‘shayotgan aziz o‘qituvchi va murabbiylar hamda ustozlarimizni yana bir bor bayram bilan qutlab, ularga uzoq umr, mustahkam sog‘lik, baxt-saodat, kelgusidagi ustozlik faoliyatlarida ulkan muvaffaqiyatlar tilayman.