Viloyat IIB boshlig‘ining o‘rinbosarlari, sohaviy xizmatlar hamda Qarshi va Nishon tumanlari IIB boshliqlari, ularning o‘rinbosarlari hamda profilaktika inspektorlari ishtirok etgan yig‘ilishda boshqarma boshlig‘i polkovnik Abduvoxid Ismoilov kriminogen vaziyatni jilovlash, jinoyatlarni erta aniqlab oldini olish, sodir etilganlarini fosh etish, fuqarolar va jamoat xavfsizligini ta’minlash, davlatimiz rahbarining PQ-1-sonli qarori ijrosi borasida amalga oshirilgan ishlarni tanqidiy tahlil etdi.

Har ikkala tumanlarda qonun ustuvorligini ta’minlash, huquqbuzarliklar va jinoyatlarni erta aniqlab oldini olish, ro‘y berganlarini fosh etish borasida amalga oshirilgan ishlar, faoliyatda yo‘l qo‘yilgan kamchiliklar muhokama qilindi.

Ichki ishlar organlari xodimlari hamkor xizmatlar bilan birga huquq-tartibotni mustahkamlash, jamoat tartibini saqlash, osuda turmushga zamin hozirlashda keng jamoatchilik, ayniqsa, mahalliy hokimliklar, korxona va tashkilotlarning mahalla yettiligi bilan hamkorligini yanada kuchaytirish lozimligi ta’kidlandi.

Ushbu jarayonda  “fuqarobay”, “xonadonbay” va “mahallabay” ishlarni jadallashtirish, fuqarolarnining kundalik va maishiy muammolarini aniqlab, tezda bartaraf etish, asosiy e’tiborni fuqarolarning murojaatlarida keltirilgan muammolarga qaratish, aholining e’tiroziga sabab bo‘luvchi holatlarni barvaqt aniqlash va ushbu muammolarni hamkor tashkilotlar bilan birgalikda hal etish bugungi kunning dolzarb masalasi ekanligi ishtirokchilar e’tiboriga yetkazildi. 

  Yakunda har ikkala tuman boshliqlari va viloyatdan biriktirilgan mas’ul rahbar oldiga xizmat davomida yo‘l qo‘yilgan xato va kamchiliklarni bartaraf etish, PQ-1-sonli qaror bo‘yicha ishlarni jadallashtirish  hamda kelgusida amalga oshirilishi lozim bo‘lgan vazifalar belgilab berilib, mas’uliyati oshirildi.

  Yig‘ilishda viloyat IIB TQX Kiberxavfsizlik bo‘limi mas’ul xodimi ishtirokchilarga kibermakonda sodir etilayotgan jinoyatlar turlari, soxta ilovalar va ulardan saqlanish hamda qonunchilikda belgilangan javobgarlik masalalari borasida atroflicha tushunchalar berdi.