“Obod qishloq” va “Obod mahalla” dasturi amalda
Qashqadaryoda viloyat sektorlar rahbarlari “Obod qishloq” va “Obod mahalla” dasturi doirasida bunyodkorlik ishlariga bosh-qosh bo‘lmoqda. Bunda asosiy e’tibor fuqarolarga shart-sharoit yaratish, kundalik va maishiy, kommunal hamda qishloqlar infratuzilmasini yaxshilashga qaratilmoqda. Bu borada barcha tumanlardagi mahallarda yo‘llar infratuzilmasini yaxshilash, tuproqli yo‘llarga tosh-shag‘al yotqizish ishlari jadal tus olgan. Jumladan, ayni kezlarda viloyatdagi mahallalar ichki yo‘llarini shag‘allashtirishda boshqa sohalar qatori ichki ishlar organlari xodimlari ham faol ishtirok etmoqda. Tizim xodimlari tadbirga avtogreyder, katok, trayler, yuklovchi va qum tashish texnikalarini jalb etgan holda Qamashi tumanidagi “Qishliq” mahallasining Mevazor ko‘chasidagi ichki tuproq yo‘llarning 3 km.ga 2300 m3 qum-shag‘al aralashmasi to‘kilib, shag‘allashtirildi. Shuningdek, 1 km. ichki yo‘llar atrofi obodonlashtirildi.
Amalga oshirilayotgan ishlarda viloyat ichki ishlar organlari xodimlari yo‘l harakati xavfsizligini ta’minlash, jamoat tartibini saqlash bilan birga qishloqlar infratuzilmasini yaxshilash borasida amalga oshirilayotgan ommaviy ishlarda ishchi guruh tarkibida faol ishtirok etmoqda.
Bu boradagi bunyodkorlik ishlari viloyatning barcha shahar-tumanlarida davom ettirilmoqda.
