Ichki ishlar organlari xodimlarining maʼnaviy va maʼrifiy bilimini boyitish, ajdodlar merosi va aql zakosi mahsuli boʼlgan asarlarini oʼrganish, kitobxonlik madaniyati va kitobsevarlik xislatlarini yanada oshirish maqsadida tez-tez turli mavzularda tadbirlar uyushtirib kelinmoqda. Jumladan, yaqinda IIV Qashqadaryo akademik litseyida Oʼzbekiston Respublikasi IIV ishchi guruhi va viloyat IIB Kadrlar boshqarmasi tashabbusi bilan ichki ishlar organlarining sohaviy xizmatlari va shahar-tumanlarida xizmat olib borayotgan xodimlari oʼrtasida “Temur tuzuklari bilimdoni” bellashuvi boʼlib oʼtdi. Tadbirni Qashqadaryo viloyati IIB boshligʼi oʼrinbosari polkovnik Habibulla Bozorov ochdi.
Uch shart – krossvord yechish, Temur tuzuklari yuzasidan savol javob va tuzukda keltirilgan jumlalarni davom ettirish yoʼnalishida boʼlib oʼtgan bellashuvda bilimdonlar mahorati IIV Maʼnaviy-maʼrifiy ishlar va kadrlar bilan taʼminlash departamenti masʼul xodimi, IIV Qashqadaryo akademik litseyi va Qarshi DU oʼqituvchilari hamda boshqarma Kadrlar boshqarmasi masʼul xodimlaridan tarkib topgan hayʼat tomonidan baholab borildi. Bahs va munozaralarga boy kechgan bilimdonlar bellashuvida ichki ishlar organlari xodimlari sohibqiron hayoti va faoliyati, jangu jadallari bilan bogʼliq koʼplab maʼlumotlarni bilishi maʼlum boʼldi.
Hakamlar hayʼati tomonidan eʼlon qilingan natijalarga koʼra, 1-oʼrinni Qashqadaryo viloyati Koson tumani IIB profilaktika inspektori katta leytenant Mirjalol Mursalov qoʼlga kiritdi. Kasbi tumani IIB 14-sonli IIB surishtiruv guruhi surishtiruvchisi katta leytenant Bobur Shoymardanov 2-oʼrinni, Qashqadaryo viloyati IIB JIEB 33-son Manzil-koloniyasi kadrlar guruhi katta inspektori leytenant Muzaffar Bashirov 3-oʼrinni band etdi.
Tanlov gʼoliblari boshqarma rahbariyatining faxriy yorligʼi va qimmatbaho sovgʼalari bilan taqdirlandi.